വിലാപയാത്ര തുടങ്ങി, ഒരുനോക്ക് കാണാന് ജനപ്രവാഹം, കോടിയേരിക്ക് നാടിന്റെ അന്ത്യാഭിവാദ്യം
Synopsis
തുറന്ന വാഹനത്തില് പ്രവര്ത്തകരുടെ അകമ്പടിയോടെയാണ് വിലാപയാത്ര. പതിനാല് കേന്ദ്രങ്ങളില് ജനങ്ങള്ക്ക് ആദരം അര്പ്പിക്കാന് വിലാപയാത്ര നിര്ത്തും.
കണ്ണൂര്: എയര് ആംബുലന്സില് കണ്ണൂരിലെത്തിച്ച കോടിയേരി ബാലകൃഷ്ണന്റെ മൃതദേഹം നേതാക്കള് ഏറ്റുവാങ്ങി. തലശ്ശേരിയിലേക്ക് മൃതദേഹവും വഹിച്ചുള്ള വിലാപയാത്ര ആരംഭിച്ചു. തുറന്ന വാഹനത്തില് പ്രവര്ത്തകരുടെ അകമ്പടിയോടെയാണ് വിലാപയാത്ര. പതിനാല് കേന്ദ്രങ്ങളില് ജനങ്ങള്ക്ക് ആദരം അര്പ്പിക്കാന് വിലാപയാത്ര നിര്ത്തും. മട്ടന്നൂര്, നെല്ലൂന്നി, ഉരുവച്ചാല്, നീര്വേലി, കൂത്തുപറമ്പ്, ആറാംമൈല്, വെറ്റുമ്മല്, കതിരൂര്, പൊന്ന്യം, ചുങ്കം എന്നിടവങ്ങളില് ജനങ്ങള്ക്ക് ആദരം അര്പ്പിക്കാം. കോടിയേരിയെ അവസാനമായി കാണാന് വന് ജനപ്രവാഹമാണ് റോഡിന് ഇരുവശവും നിറഞ്ഞിരിക്കുന്നത്.
തലശ്ശേരിയിലേക്ക് എത്തിക്കുന്ന മൃതദേഹം ടൗണ് ഹാളില് ഇന്ന് പൊതുദര്ശത്തിന് വെക്കും. മുഖ്യമന്ത്രിയും മന്ത്രിമാരും തലശ്ശേരി ടൗണ്ഹാളിലെത്തി. കോടിയേരിയുടെ നിര്യാണത്തില് ആദരസൂചകമായി തലശ്ശേരി,ധര്മ്മടം,കണ്ണൂര് മണ്ഡലങ്ങളില് നാളെ ഹര്ത്തല് പ്രഖ്യാപിച്ചു. വാഹനങ്ങളെയും ഹോട്ടലുകളെയും നാളത്തെ ഹര്ത്താലില് നിന്ന് ഒഴിവാക്കി. സംസ്ക്കാരം പൂര്ണ്ണ ബഹുമതികളോടെ നാളെ വൈകിട്ട് മൂന്ന് മണിക്ക് പയ്യാമ്പലത്ത് നടക്കും. രാവിലെ 11.22 നാണ് ചെന്നൈ വിമാനത്താവളത്തില് നിന്ന് കോടിയേരിയുടെ മൃതദേഹവുമായി എയര് ആംബുലന്സ് പുറപ്പെട്ടത്. ഭാര്യ വിനോദിനിയും മകന് ബിനീഷും മരുമകള് റിനീറ്റയും എയര് ആംബുലന്സില് ഒപ്പമുണ്ടായിരുന്നു.
ഇന്നലെ രാത്രി എട്ടുമണിക്കാണ് ചെന്നൈയിലെ അപ്പോളോ ആശുപത്രിയില് വെച്ച് കോടിയേരി ബാലകൃഷ്ണന് അന്തരിച്ചത്. ദീര്ഘനാളായി അസുഖബാധിതനായിരുന്നു. കർക്കശക്കാരായ കമ്യൂണിസ്റ്റുകൾക്കിടയിൽ എന്നും സൗമ്യനും, സമവായ അന്വേഷകനുമായിരുന്നു സി പി എം പിബി അംഗവും മുന് സംസ്ഥാന സെക്രട്ടറിയുമായ കോടിയേരി. മൂന്ന് തവണയാണ് സംസ്ഥാന സെക്രട്ടറിയായി സി പി എമ്മിനെ കോടിയേരി നയിച്ചത്. അഞ്ചുതവണ തലശ്ശേരിയില് നിന്ന് എം എല് എയായി. വിദ്യാർത്ഥി രാഷ്ട്രീയം മുതൽ സി പി എം സംസ്ഥാന സെക്രട്ടറി പദം വരെയും പിണറായി വിജയന്റെ കാൽപാടുകളായിരുന്നു കോടിയേരിയുടെ പടവുകൾ.
കണ്ണൂരിൽ നിന്നും യാത്ര തുടങ്ങിയാൽ പിണറായി കഴിഞ്ഞാണ് കോടിയേരി. കഴിഞ്ഞ മൂന്ന് പതിറ്റാണ്ടിലെ സി പി എം രാഷ്ട്രീയം എടുത്താലും പിണറായി കഴിഞ്ഞാൽ കോടിയേരി ആയിരുന്നു. കണ്ണൂരിൽ നിന്നും സംസ്ഥാന കമ്മിറ്റിയിലും, സെക്രട്ടറിയേറ്റിലും, കേന്ദ്രകമ്മിറ്റിയിലും പൊളിറ്റ് ബ്യുറോയിൽ എത്തുന്നതിലും, ഒടുവിൽ പാർട്ടി സംസ്ഥാന സെക്രട്ടറി പദത്തിലും ബാലകൃഷ്ണൻ വിജയന്റെ തുടർച്ചയായി.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam