മന്ത്രി ഇടപെട്ടു, നാട്ടികയിലെ ടോൾ പിരിവ് നിർത്തിവച്ചു; തീരുമാനം പണി തീരാത്ത റോഡിലെ ടോൾ പിരിവിനെതിരെ പ്രതിഷേധം ഉയർന്നതോടെ

നാട്ടികയിൽ നിർമ്മാണം പൂർത്തിയാക്കാത്ത റോഡിലെ ടോൾ പിരിവിനെതിരെ യുഡിഎഫ് പ്രവർത്തകർ വൻ പ്രതിഷേധം നടത്തി. ഗതാഗത കുരുക്ക് ഉണ്ടാകുമെന്ന റിപ്പോർട്ടുകളുടെയും പ്രതിഷേധത്തിന്‍റെയും അടിസ്ഥാനത്തിൽ ടോൾ പിരിവ് നിർത്തിവെക്കാൻ മന്ത്രി പി കെ ബഷീർ നിർദേശം നൽകി.

തൃശൂർ: പ്രതിഷേധം ശക്തമായതോടെ നാട്ടികയിലെ ടോൾ പിരിവ് നിർത്തിവെക്കാൻ പൊതുമരാമത്ത് മന്ത്രി പി കെ ബഷീർ നിർദേശം നൽകി. കൊടുങ്ങല്ലൂർ - കപ്രിക്കാട് സ്‌ട്രെച്ചിൽ സർവീസ് റോഡിന്‍റെയും പാലത്തിന്‍റെ അപ്രോച്ച് റോഡിന്‍റെയും പണി പൂർത്തിയായിട്ടില്ല. ഇപ്പോൾ ടോൾ തുടങ്ങിയാൽ ഈ മേഖലയിൽ ഗതാഗത കുരുക്ക് ഉണ്ടാകുമെന്ന് കലക്ടറുടെയും പൊലീസിന്‍റെയും റിപ്പോർട്ട്‌ ഉണ്ട്. ഇതിന്‍റെ അടിസ്ഥാനത്തിൽ ആണ് ടോൾ പിരിവ് താത്കാലികമായി നിർത്തിവെക്കാൻ മന്ത്രി പി കെ ബഷീർ നിർദേശം നൽകിയത്.

നിർമ്മാണം പൂർത്തിയാക്കാത്ത റോഡിൽ ടോൾ പിരിക്കാൻ അനുവദിക്കില്ലെന്ന് പറഞ്ഞ് രാവിലെ മുതൽ യുഡിഎഫ് പ്രവർത്തകരാണ് സമരം നടത്തിയത്. പ്രതിഷേധ സമരം പൊലീസ് തടഞ്ഞതോടെ പ്രവർത്തകർ റോഡിൽ കുത്തിയിരുന്നു. ഇവരെ അറസ്റ്റ് ചെയ്യാൻ പൊലീസ് ശ്രമിച്ചതോടെ സംഘർഷാവസ്ഥയായി. നേതാക്കളെയും പ്രവർത്തകരെയും പൊലീസ് ബലം പ്രയോഗിച്ച് അറസ്റ്റ് ചെയ്ത് നീക്കി. തുടർന്ന് ടോൾ പിരിവ് തുടങ്ങിയിരുന്നു. വാഹനങ്ങൾ ഫാസ്റ്റ് ട്രാക്ക് സംവിധാനം വഴി സ്കാൻ ചെയ്താണ് ടോൾ ഈടാക്കിയത്.

കോൺഗ്രസ് നേതാക്കളായ ജോസ് വള്ളൂർ, ശോഭ സുബിൻ, ജന പ്രതിനിധികളായ സി എം നൗഷാദ്, പി വിനു തുടങ്ങിയ നേതാക്കളെയാണ് പൊലീസ് അറസ്‌റ്റ് ചെയ്തത്. ഇവരെ പിന്നീട് പൊലീസ് വാഹനത്തിൽ സ്റ്റേഷനിലേക്ക് മാറ്റി. സംഭവമറിഞ്ഞ് സ്ഥലത്തേക്ക് കൂടുതൽ പ്രവർത്തകർ എത്തിയിരുന്നു. സംഘർഷം കണക്കിലെടുത്ത് വൻ പൊലീസ് സംഘം സ്ഥലത്ത് ക്യാമ്പ് ചെയ്തിരുന്നു. എന്നാൽ മന്ത്രി ഇടപെട്ട് നിലവിൽ ടോൾ പിരിക്കുന്നത് നിർത്തി വച്ചിരിക്കുകയാണ്.