'യൂട്യൂബിലൂടെ വ്യാജപ്രചാരണം നടത്തി, ജീവിതം പ്രതിസന്ധിയിലാക്കി'; യൂട്യൂബർ രാജൻ ജോസഫിനെതിരെ പരാതിയുമായി ചൂരൽമല ദുരന്തബാധിതൻ നൗഫൽ

നിരന്തരം അധിക്ഷേപ വീഡിയോ ചെയ്ത് മാനഹാനി ഉണ്ടാക്കുന്നുവെന്നും യൂട്യൂബ് വീഡിയോ കൊണ്ട് ജീവിതം പ്രതിസന്ധിയിലായി എന്നും നൗഫൽ ഏഷ്യാനെറ്റ് ന്യൂസിനോട് വ്യക്തമാക്കി.

കൽപറ്റ: യൂട്യൂബർ രാജൻ ജോസഫിനെതിരെ പരാതിയുമായി ചൂരൽമല ദുരന്തബാധിതനായ നൗഫൽ. ടൗൺഷിപ്പിലെ വിള്ളൽ വിവാദത്തിൽ തനിക്കെതിരെ വ്യാജ ആരോപണം നടത്തുന്നുവെന്നാണ് പരാതി. യൂട്യൂബ് വീഡിയോ കൊണ്ട് ജീവിതം പ്രതിസന്ധിയിലാണെന്ന് നൗഫൽ ഏഷ്യാനെറ്റ് ന്യൂസിനോട് പറഞ്ഞു. വയനാട് എസ്പിക്ക് നൗഫൽ പരാതിയും നൽകിയിട്ടുണ്ട്. വയനാട് ടൗൺഷിപ്പിലെ വീടിന്റെ മുകൾഭാ​ഗത്ത് വിള്ളൽ വീണത് വാർത്തയും വിവാദവുമായിരുന്നു. നൗഫലിന്റെ വീട്ടിലാണ് വിള്ളൽ കണ്ടെത്തിയത്. 

നൗഫലിനെതിരെ വ്യാജ പ്രചരണങ്ങൾ നടക്കുന്നുവെന്ന് ചൂണ്ടിക്കാണിച്ചാണ് ഇപ്പോൾ എസ്പി ഓഫീസിൽ പരാതി നൽകിയിരിക്കുന്നത്. നിരന്തരം അധിക്ഷേപ വീഡിയോ ചെയ്ത് മാനഹാനി ഉണ്ടാക്കുന്നുവെന്നും യൂട്യൂബ് വീഡിയോ കൊണ്ട് ജീവിതം പ്രതിസന്ധിയിലായി എന്നും നൗഫൽ ഏഷ്യാനെറ്റ് ന്യൂസിനോട് വ്യക്തമാക്കി. യൂട്യൂബർ കാരണം ജോലിയില്ലാത്ത അവസ്ഥ ഉണ്ടായി എന്നും തന്റെ മാനസികാവസ്ഥ പോലും തകർന്ന നിലയിലായി എന്നാണ് നൗഫലിന്റെ തുറന്നുപറച്ചിൽ.