നവകേരള സദസ്സിന് പണം നല്കാന് യുഡിഎഫ് ഭരിക്കുന്ന തിരുവല്ല നഗരസഭയും കോന്നി ബ്ലോക്ക് പഞ്ചായത്തും
Synopsis
തിരുവല്ല നഗരസഭ ആദ്യഘട്ടമായി 50000 രൂപ നല്കി. സംഭവത്തില് ഡിസിസി വിശദീകരണം തേടിയേക്കും
പത്തനംതിട്ട: കേരള സര്ക്കാരിന്റെ നവകേരള സദസ്സിനായി പണം നല്കാന് യുഡിഎഫ് ഭരണത്തിലുള്ള തദ്ദേശ സ്വയം ഭരണ സ്ഥാപനങ്ങള്. യുഡിഎഫ് ഭരിക്കുന്ന തിരുവല്ല നഗരസഭയും കോന്നി ബ്ലോക്ക് പഞ്ചായത്തുമാണ് നവകേരള സദസ്സിന് പണം നല്കാന് തീരുമാനിച്ചത്. ഇതിന്റെ ഭാഗമായി തിരുവല്ല നഗരസഭ ആദ്യഘട്ടമായി 50000 രൂപ നല്കി. കോന്നി ബ്ലോക്ക് പഞ്ചായത്ത് ഭരണസമിതി യോഗവും പണം നല്കാന് തീരുമാനിച്ചു. രണ്ടു സംഭവങ്ങളിലും പത്തനംതിട്ട ഡിസിസി നേതൃത്വം വിശദീകരണം തേടിയേക്കും.
തദ്ദേശ സ്ഥാപനങ്ങള് നവകേരള സദസ്സിന് പണം നല്കണമെന്നാവശ്യപ്പെട്ട് നേരത്തെ അഡീഷനല് ചീഫ് സെക്രട്ടറി ഉത്തരവിറക്കിയിരുന്നു. എന്നാല്, നവകരേള സദസ്സിന് പണം നല്കേണ്ടന്നാണ് കോണ്ഗ്രസ് പാര്ട്ടി നിര്ദേശം. യുഡിഎഫ് ഭരണത്തിലുള്ള തദ്ദേശ സ്വയം ഭരണ സ്ഥാപനങ്ങള് പണം നല്കരുതെന്നും പാര്ട്ടി നിര്ദേശം നല്കിയിരുന്നു. ഈ നിര്ദേശം മറികടന്നാണിപ്പോള് തിരുവല്ല നഗരസഭയും കോന്നി ബ്ലോക്ക് പഞ്ചായത്തും പണം നല്കാന് തീരുമാനിച്ചിരിക്കുന്നത്. നേരത്തെ യുഡിഎഫ് ഭരിക്കുന്ന കണ്ണൂര് ശ്രീകണ്ഠാപുരം നഗരസഭ നവകേരള സദസ്സിന് അരലക്ഷം രൂപ അനുവദിച്ചത് വിവാദമായതോടെ തീരുമാനം പിന്വലിച്ചിരുന്നു.