പ്ലസ് വൺ ക്ലാസുകൾ തുടങ്ങി; പ്രവേശനം നേടിയത് മൂന്നര ലക്ഷത്തിലേറെ വിദ്യാർത്ഥികൾ; സപ്ലിമെന്‍ററി അലോട്ട്​മെന്‍റ് 13 മുതൽ

സംസ്ഥാനത്ത് പ്ലസ് വൺ ക്ലാസുകൾ ആരംഭിച്ചു. മുഖ്യഘട്ട അലോട്ട്മെൻ്റുകളിൽ മൂന്നര ലക്ഷത്തിലേറെ വിദ്യാർത്ഥിളാണ് പ്രവേശനം നേടിയത്. ഈ മാസം 13 മുതൽ സപ്ലിമെൻ്ററി അലോട്ട്മെൻ്റ് പ്രവേശനം ആരംഭിക്കും. 

തിരുവനന്തപുരം: സംസ്ഥാനത്ത് മൂന്നര ലക്ഷത്തിലേറെ വിദ്യാർത്ഥികളുമായി പ്ലസ് വൺ ക്ലാസുകൾ ഇന്ന് ആരംഭിച്ചു. 81 ശതമാനം വിദ്യാർത്ഥികളും പ്രവേശനം നേടിയെന്ന് അധികൃതർ അറിയിച്ചു. മുഖ്യഘട്ട അലോട്ട്മെൻ്റുകളിൽ 3,59,890 വിദ്യാർത്ഥികളാണ് പ്രവേശനം നേടിയത്. 81,375 സീറ്റുകളിൽ കൂടി ഒഴിവുണ്ട്.

തിരുവനന്തപുരം ജില്ലയിൽ മുഖ്യഘട്ട അലോട്ട്മെൻ്റുകളിൽ 30,315 വിദ്യാർത്ഥികളാണ് പ്രവേശനം നേടിയത്. ജില്ലയിൽ വിവിധ വിഭാഗങ്ങളിൽ 7,481 സീറ്റുകൾ ഒഴിവുണ്ട്.

ജില്ല, പ്രവേശനം നേടിയ വിദ്യാർത്ഥികളുടെ എണ്ണം/ഒഴിവുകൾ

1. തിരുവനന്തപുരം: 30315/7481
2. കൊല്ലം: 25170/6012
3. പത്തനംതിട്ട: 10365/4337
4. ആലപ്പുഴ 19710/4599
5. കോട്ടയം: 17528/4536
6. ഇടുക്കി: 9798/2041
7. എറണാകുളം: 28619/8140
8. തൃശൂർ: 30615/7706
9. പാലക്കാട്: 30517/5140
10. കോഴിക്കോട്: 35502/7600
11. മലപ്പുറം: 64393/14348
12. വയനാട്: 10035/1318
13. കണ്ണൂർ: 30727/4988
14. കാസർകോട് 16596/3129

അതേസമയം മലപ്പുറം, കോഴിക്കോട് ജില്ലകളിൽ നിരവധി വിദ്യാർഥികൾക്ക് പ്ലസ് വൺ പ്രവേശനം ലഭിച്ചിട്ടില്ല. ശേഷിക്കുന്ന മെറിറ്റ്​ സീറ്റുകളിലേക്ക് നടക്കുന്ന ​ സപ്ലിമെന്‍ററി അലോട്ട്​മെന്‍റിനായി കാത്തിരിക്കുകയാണ് വിദ്യാർത്ഥികൾ. ഈ മാസം 13 മുതലാണ് സപ്ലിമെൻ്ററി അലോട്ട്മെൻ്റ് പ്രവേശനം ആരംഭിക്കുക.