മഹാരാജാസിലെ ബിരുദദാന ചടങ്ങിനിടെ പ്രതിഷേധം; അച്ചടക്ക നടപടി വേണമെന്ന് പ്രിൻസിപ്പലിന് കെഎസ്‌യുവിൻ്റെ പരാതി, 'ചടങ്ങ് അലങ്കോലപ്പെടുത്തി'

മഹാരാജാസ് കോളേജിലെ ബിരുദദാന ചടങ്ങിൽ മന്ത്രിക്കെതിരെ പ്രതിഷേധിച്ചവർക്കെതിരെ നടപടി ആവശ്യപ്പെട്ട് കെഎസ്‌യു പ്രിൻസിപ്പലിന് കത്ത് നൽകി. സംഭവത്തിൽ വിദ്യാർഥികൾക്കെതിരെ പൊലീസ് കേസെടുത്തിട്ടുണ്ട്.

കൊച്ചി: എറണാകുളം മഹാരാജാസ് കോളേജിലെ ബിരുദദാന ചടങ്ങിനിടെ ഉന്നത വിദ്യാഭ്യാസ മന്ത്രി റോജി എം ജോണിനെതിരെ പ്രതിഷേധം ഉയർത്തിയവർക്കെതിരെ അച്ചടക്ക നടപടി ആവശ്യപ്പെട്ട് കെഎസ്‌യു. പ്രിൻസിപ്പലിന് ഇത് സംബന്ധിച്ച് കത്ത് നൽകി. വിയോജിപ്പ് പ്രകടിപ്പിക്കുകയല്ല, ചടങ്ങ് അലങ്കോലപ്പെടുത്തുകയാണ് ചെയ്തതെന്നാണ് കെഎസ്‌‍യുവിന്റെ പരാതി. കണ്ടാലറിയാവുന്ന ഒരു കൂട്ടം വിദ്യാർഥികൾക്കെതിരെ സെൻട്രൽ പൊലീസ് കേസെടുത്തിട്ടുണ്ട്. മന്ത്രിയിൽ നിന്ന് സർട്ടിഫിക്കറ്റ് വാങ്ങാൻ കഴിയാതിരുന്ന വിദ്യാർഥികൾ ഇന്നു രാവിലെ മന്ത്രി പങ്കെടുത്ത തുറവൂരിലെ ചടങ്ങിൽ എത്തി ബിരുദ സർട്ടിഫിക്കറ്റ് വാങ്ങി.

അതേസമയം, മഹാരാജാസ് കോളേജിൽ മന്ത്രിക്കെതിരെ പ്രതിഷേധിച്ച വിദ്യാർഥികൾക്കെതിരെ പൊലീസ് കേസെടുത്തു. പൊതുപരിപാടികൾ മനപ്പൂർവം അലങ്കോലപ്പെടുത്തുന്നത് തടയുന്നതിനുള്ള KPDPM (Kerala Prevention of Damage to Private Property and Payment of Compensation / Prevention of Disturbances of Public Meetings) ആക്ട് പ്രകാരമാണ് കേസ് രജിസ്റ്റർ ചെയ്തിരിക്കുന്നത്. അതിനിടെ, കാലടി സർവകലാശാലയിലെ പ്രതിഷേധത്തെ തുടർന്ന് സസ്പെൻഷനിലായ വിദ്യാർഥികൾക്ക് പരീക്ഷയെഴുതാൻ ഹൈക്കോടതി അനുമതി നൽകി. വിദ്യാർഥികൾക്ക് നാളെത്തന്നെ പരീക്ഷാ ഫീസ് അടയ്ക്കാം. ഈ വിദ്യാർഥികളുടെ സസ്പെൻഷൻ തുടരുന്നതിലാണ് എസ്എഫ്ഐ പ്രവർത്തകർ മന്ത്രിക്കെതിരെ പ്രതിഷേധിച്ചത്.