വീണ ജോർജ് എവിടെ? ചികിത്സ അവധിയിലെന്ന് സിപിഎം ജില്ലാ സെക്രട്ടറി, സജീവമായി പാർട്ടിയിൽ ഉണ്ടാകുമെന്ന് പ്രതീക്ഷിക്കുന്നുവെന്നും രാജു എബ്രഹാം

വീണ ജോർജ് ചികിത്സ അവധിയിലാണെന്നും പാർട്ടിയിൽ സജീവമാകുമെന്നാണ് പ്രതീക്ഷയെന്നും സിപിഎം പത്തനംതിട്ട ജില്ലാ സെക്രട്ടറി. സസ്പെൻഷനിലുള്ള എ പത്മകുമാറിന് വരാനിരിക്കുന്ന വിപുലീകൃത ജില്ലാ കമ്മിറ്റി യോഗത്തിൽ പങ്കെടുക്കാനാകില്ലെന്നും രാജു എബ്രഹാം

പത്തനംതിട്ട: മുൻ ആരോഗ്യമന്ത്രി മന്ത്രി വീണ ജോർജ് സജ്ജീവമായി പാർട്ടി പ്രവർത്തനത്തിൽ ഉണ്ടാകുമെന്നാണ് വിശ്വസിക്കുന്നതെന്ന് സി പി എം പത്തനംതിട്ട ജില്ലാ സെക്രട്ടറി രാജു എബ്രഹാം. ചികിത്സയുമായി ബന്ധപ്പെട്ട് പാർട്ടിയിൽ നിന്ന് അവധിയെടുത്തിരുന്നുവെന്നാണ് മനസ്സിലാക്കുന്നത്. പിന്നീട് അതിന്‍റെ പുരോഗതി അറിയില്ല. സംസ്ഥാന കമ്മിറ്റി അംഗമായതിനാൽ ജില്ലാ കമ്മിറ്റിയെ അറിയിക്കണമെന്നില്ല. എല്ലാം സംസ്ഥാന കമ്മിറ്റിയുമായി ബന്ധപ്പെട്ട കാര്യമാണ്. തെറ്റുതിരുത്തലിന്‍റെ ഭാഗമായുള്ള വിപുലീകൃത സി പി എം ജില്ലാ കമ്മിറ്റി യോഗത്തിന് മുന്നോടിയായുള്ള വാർത്താസമ്മേളനത്തിലായിരുന്നു വീണ ജോർജ് എവിടെ എന്നുള്ള ചോദ്യത്തിന് ജില്ലാ സെക്രട്ടറിയുടെ മറുപടി. ഈ മാസം 6, 7 തീയതികളിലാണ് പത്തനംതിട്ടയിലെ യോഗം. സസ്പെൻഷൻ നടപടി നേരിട്ട് പുറത്തു നിൽക്കുന്ന മുതിർന്ന നേതാവും സ്വർണകൊള്ള കേസിൽ പ്രതിയുമായ എ പത്മകുമാറിന് വിശാല ജില്ലാ കമ്മിറ്റി യോഗത്തിൽ പങ്കെടുക്കാൻ ആകില്ലെന്നും രാജു എബ്രഹാം അറിയിച്ചു. കേസിലെ കുറ്റപത്രം വന്നശേഷം മാത്രമേ എന്ത് കുറ്റമാണ് പത്മകുമാർ ചെയ്തതെന്ന് വ്യക്തമാകു എന്നും സി പി എം ജില്ലാ സെക്രട്ടറി കൂട്ടിച്ചേർത്തു.

ഏഷ്യാനെറ്റ് ന്യൂസ് വാർത്തകൾ തത്സമയം കാണാം