Silver Line:കോടതി വിധികൾ ആശ്വാസം; ഇടവേളക്ക് ശേഷം സർവേ വീണ്ടും; പ്രതിഷേധം തുടരാൻ സാധ്യത
Synopsis
അതേസമയം സർവേ തടയാനാകില്ലെന്ന കോടതി വിധികളാണ് സർക്കാരിന് ആശ്വാസം
തിരുവനന്തപുരം: ചെറിയ ഇടവേളക്ക് ശേഷം കെ റെയിൽ (K RAIL)സർവേ (survey)ഇന്ന് പുനരാരംഭിക്കും. അതേസമയം അതിരടയാള കല്ലിടാനെത്തുന്ന പ്രദേശങ്ങളിലെല്ലാം പ്രതിഷേധം ഉണ്ടാകാനാണ് സാധ്യത. അതേസമയം സർവേ തടയാനാകില്ലെന്ന കോടതി വിധികളാണ് സർക്കാരിന് ആശ്വാസം
പ്രതിഷേധത്തില് മുങ്ങി മാമല; കല്ല് തോട്ടിലെറിഞ്ഞു, പൊലീസും പ്രതിഷേധക്കാരും തമ്മില് ഉന്തും തള്ളും
കൊച്ചി: കോട്ടയത്തിന് പിന്നാലെ എറണാകുളം മാമലയിലും കെ റെയിലിനെചൊല്ലി കഴിഞ്ഞ ദിവസം സംഘര്ഷം ഉണ്ടായി. കല്ലിടാന് മാമലയിലെത്തിയ സില്വര്ലൈന് സര്വേ സംഘത്തെ നാട്ടുകാര് തടഞ്ഞു. പിന്നാലെ പൊലീസുകാരും നാട്ടുകാരും തമ്മില് വാക്കേറ്റവും ഉന്തും തള്ളുമുണ്ടായി. പൊലീസ് ഗോ ബാക്ക് വിളികളുമായി യുഡിഎഫ് പ്രവര്ത്തകര് റോഡ് ഉപരോധിച്ചു. പ്രദേശത്ത് നേരത്തെ സ്ഥാപിച്ച കല്ലുകള് പിഴുത് നാട്ടുകാര് തോട്ടിലെറിഞ്ഞു. പ്രതിഷേധം കനത്തതോടെ സര്വ്വേ നടപടികള് നിര്ത്തിവെച്ചു.
കോട്ടയം നട്ടാശ്ശേരിയിൽ പ്രതിഷേധക്കാർ കല്ലുകൾ പിഴുത് സർവെ ഏജൻസികളുടെ വാഹനത്തിൽ തിരികെ കൊണ്ടിട്ടു. രണ്ടു കല്ലുകളുമായി പ്രദേശത്തെ വില്ലേജ് ഓഫീസിലേക്ക് മാർച്ച് ചെയ്തെത്തിയ പ്രതിഷേധക്കാർ വില്ലേജ് വളപ്പിൽ കുഴികുത്തി കല്ലിട്ടു. കനത്ത പ്രതിഷേധത്തെ തുടർന്ന് കോട്ടയത്ത് സർവ്വേ നടപടികൾ താത്കാലികമായി നിർത്തിവച്ചു.
സർവേ തടയാനാകില്ലെന്ന് ഹൈക്കോടതി; പദ്ധതിയിൽ ജനങ്ങളുടെ ആശങ്ക അകറ്റണമെന്ന് കെസിബിസി
കൊച്ചി: സിൽവർ ലൈൻ (silver line)സർവേയുമായി(survey) ബന്ധപ്പെട്ട രണ്ട് ഹർജികൾ(harji) കൂടി ഹൈക്കോടതി (high court)തള്ളി. രണ്ട് റിട്ട് ഹർജികൾ ആണ് തള്ളിയത്. സർവേ നടത്തുന്നതും അതിരടയാള കല്ല് സ്ഥാപിക്കുന്നതും തടയണമെന്നായിരുന്നു ആവശ്യം. സിൽവർ ലൈൻ സ്പെഷ്യൽ പദ്ധതി അല്ലെന്നും സർവേ തടയാനാകില്ലെന്നും ഹൈക്കോടതി വ്യക്തമാക്കി. ജസ്റ്റിസ് എൻ.നഗരേഷിന്റെതാണ് ഉത്തരവ്.
കെ റെയില് റെയിൽവെയുടെ പദ്ധതിയല്ലെന്നതിനാൽ ഭൂമി ഏറ്റെടുക്കാൻ കേന്ദ്ര സർക്കാരിന്റെ വിജ്ഞാപനം ആവശ്യമില്ലെന്ന സംസ്ഥാന സർക്കാരിന്റെ വാദവും കോടതി അംഗീകരിച്ചു
ഇതിനിടെ സിൽവരർലൈൻ പദ്ധതിയിൽ ജനങ്ങളുടെ ആശങ്ക അകറ്റണമെന്ന ആവശ്യവുമായി കെ സി ബി സി രംഗത്തുവന്നു. സർക്കാർ സംശയ നിവാരണം വരുത്തണം. ജനങ്ങളുടെ ഭാഗത്തുനിന്ന് ചിന്തിച്ച് സർക്കാർ ഉചിതമായ തീരുമാനം എടുക്കണം. ഇപ്പോഴത്തെ ചോദ്യങ്ങളും വിമർശനങ്ങളും പൂർണമായി അവർഗണിക്കാൻ കഴിയില്ല. പതിനായിരക്കണക്കിന് കുടുംബങ്ങൾ അരക്ഷിതാവസ്ഥയിൽ ആയിരിക്കുന്നു
സർക്കാർ വിമർശനങ്ങളെ ഗൗരവമായി തന്നെ ഉൾക്കൊളളണം.മൂലമ്പളളി പോലുളള മുൻ അനുഭവങ്ങളുടെ പശ്ചാത്തലത്തിൽ ജനങ്ങളുടെ ആശങ്കകൾ അവഗണിക്കാനാകില്ലെന്നും കെ സി ബി സി പറഞ്ഞു.
കെ സി ബി സിയുടെ പ്രസ്താവന ഇങ്ങനെ...
കേരളത്തിന്റെ വികസനപദ്ധതികള്ക്ക് ജനങ്ങള് എതിരല്ല. എന്നാല് ജനങ്ങളെ ഇരുട്ടില് നിര്ത്തിക്കൊണ്ട് പദ്ധതികള് അടിച്ചേല്പ്പിക്കാന് ശ്രമിക്കുന്നതും അതിനായി ബലപ്രയോഗങ്ങള് നടത്തുന്നതും ജനാധിപത്യ വിരുദ്ധമാണ്.അതിനെതിരായ ശബ്ദങ്ങളെ രാഷ്ട്രീയമായും, പോലീസിനെ ഉപയോഗിച്ചുമല്ല നേരിടേണ്ടത്, മറിച്ച് ജനാധിപത്യ മര്യാദയോടെ അഭിമുഖീകരിക്കാന് സര്ക്കാര് തയ്യാറാകണം. ജനങ്ങളുടെ ആശങ്കകള് പരിഹരിക്കാനുള്ള നടപടികള്ക്ക് സര്ക്കാര് പ്രാഥമിക പരിഗണന നല്കണം
പദ്ധതിയുടെ പൂര്ണ്ണ ചിത്രം വെളിപ്പെടുന്നതുവരെ ഇപ്പോഴുള്ള നടപടിക്രമങ്ങള് നിര്ത്തിവയ്ക്കണം.ഭരണകക്ഷി നേതാക്കളും അനുഭാവികളും ഉള്പ്പെടെയുള്ളവര്പ്പോലും ഇതിനകം പ്രതിഷേധം പ്രകടിപ്പിച്ചിട്ടുള്ള സാഹചര്യത്തില്, ആശങ്കകള്ക്കും എതിര്പ്പുകള്ക്കും രാഷ്ട്രീയമാനം നല്കി അവഗണിക്കാനുള്ള ശ്രമങ്ങള് ഖേദകരമാണ്. കെ റെയിലിനെക്കുറിച്ച് ഉയരുന്ന ചോദ്യങ്ങളെ കക്ഷി രാഷ്ട്രീയങ്ങള്ക്ക് അതീതമായി ജനപക്ഷത്ത് നിന്ന് പരിഗണിക്കാനും അവയെ ശരിയായ അര്ഥത്തില് ഉള്ക്കൊള്ളാനും സര്ക്കാര് തയ്യാറാകണം.
ഇപ്പോഴുള്ള സര്വേ രീതിക്ക് പകരം മറ്റു രീതികള് അവലംബിക്കാന് സര്ക്കാര് തയ്യാറാകണം.സാമൂഹിക ആഘാതപഠനത്തെ ആരും എതിര്ക്കുന്നില്ല. മറിച്ച് ഇതിനുമുമ്പെങ്ങും കണ്ടിട്ടില്ലാത്ത ജനദ്രോഹപരമായ പഠന രീതിയെയാണ് എതിര്ക്കുന്നത്. പൊതുജനത്തിന്റെ സംശയങ്ങള് ദുരീകരിച്ചും ആശങ്കകള് അകറ്റിക്കൊണ്ടും വികസനപ്രവര്ത്തനങ്ങള് നടപ്പിലാക്കാന് ഭരണാധികാരികള്ക്ക് കഴിയണം.-കേരളാ കത്തോലിക്കാ മെത്രാൻ സമിതി