'കൂടെ നിന്നവരെ മറക്കാനാവില്ല'; നന്ദി രേഖപ്പെടുത്തി മാമുക്കോയയുടെ കുടുംബം

മാധ്യമങ്ങളും, നിയമ പാലകരും രാഷ്ട്രീയ-മത-സാമൂഹിക-സാംസ്കാരിക മേഖലകളിലുള്ളവരും അദ്ദേഹത്തെ നെഞ്ചിലേറ്റുന്ന ആബാലവൃദ്ധം ജനങ്ങളും നൽകിയ പിന്തുണക്ക് ഹൃദയം നിറഞ്ഞ നന്ദി രേഖപ്പെടുത്തുന്നുവെന്നും കുടുംബം അറിയിച്ചു. 

കോഴിക്കോട്: നടൻ മാമുക്കോയയുടെ മരണത്തിൽ കൂടെ നിന്നവർക്ക് നന്ദി രേഖപ്പെടുത്തി മാമുക്കോയയുടെ കുടുംബം. വണ്ടൂരിലെ ആശുപത്രി മുതൽ അദ്ദേഹത്തിന് താങ്ങും തണലായി നിന്നവരെ മറക്കാനാവില്ലെന്ന് കുടുംബം പറഞ്ഞു. വിയോഗ വേളയിലും എംഎസ്എസിലെ അന്തിമ പരിചരണത്തിനും കോഴിക്കോട് ടൗൺഹാളിലെ പൊതുദർശനവേളയിലും അരക്കിണറിലെ വീട്ടിലും കണ്ണപ്പറമ്പിലെ കബറടക്ക ചടങ്ങിലും നാട്ടുകാരും പൊതുസമുഹവും ബന്ധുജനങ്ങളും നൽകിയ പിന്തുണയും സ്നേഹവും മറക്കാനാവില്ല. മാധ്യമങ്ങളും, നിയമ പാലകരും രാഷ്ട്രീയ-മത-സാമൂഹിക-സാംസ്കാരിക മേഖലകളിലുള്ളവരും അദ്ദേഹത്തെ നെഞ്ചിലേറ്റുന്ന ആബാലവൃദ്ധം ജനങ്ങളും നൽകിയ പിന്തുണക്ക് ഹൃദയം നിറഞ്ഞ നന്ദി രേഖപ്പെടുത്തുന്നുവെന്നും കുടുംബം അറിയിച്ചു. 

ഒരു മരണം നടക്കുമ്പോൾ ആരൊക്കെ വരണമെന്ന് നിർബന്ധം പിടിക്കാൻ ആകില്ലെന്നും ഇക്കാര്യത്തിൽ മാമുക്കോയുടെ മകൻ എടുത്ത നിലപാടാണ് ശരിയെന്നും വിദ്യാഭ്യാസ മന്ത്രി വി ശിവന്‍കുട്ടി പറഞ്ഞിരുന്നു. മാമുക്കോയക്ക് അന്ത്യാഞ്ജലി അർപ്പിക്കാൻ പ്രമുഖരടക്കം പലരും വരാത്തതിൽ അനുസ്മരണ സമ്മേളനത്തിൽ വിമർശനമുയർന്നിരുന്നു. മാമുക്കോയയ്ക്ക് മലയാള സിനിമ അർഹിച്ച ആദരവ് നൽകിയില്ലെന്നതടക്കമുള്ള രൂക്ഷ വിമർശനമാണ് അനുസ്മരണ യോഗത്തിൽ സംസാരിച്ച സംവിധായകൻ വി എം വിനു ഉന്നയിച്ചത്.

പലരും വരുമെന്ന് കരുതിയെന്നും പക്ഷേ വന്നില്ലെന്നും അദ്ദേഹം പ്രതികരിച്ചിരുന്നു. എറണാകുളത്ത് പോയി മരിച്ചാൽ കൂടുതൽ സിനിമാക്കാർ വരുമായിരുന്നു എന്ന പരിഹാസവും സംവിധായകൻ മുന്നോട്ടുവച്ചിരുന്നു. ഇതിന് പിന്നാലെ  മാമുക്കോയക്ക് സിനിമാ ലോകം അർഹിച്ച ആദരവ് നൽകിയില്ലെന്ന് കഥാകൃത്ത് ടി പത്മനാഭനും വിശദമാക്കിയിരുന്നു. ഇതിനെതിരെയാണ് മന്ത്രിയുടെ പ്രതികരണം ഉണ്ടായത്. അതേസമയം, ആരും വരാത്തതിൽ പരാതിയില്ലെന്നും മമ്മുട്ടിയും മോഹൻലാലും വിളിച്ച് സാഹചര്യം വ്യക്തമാക്കിയിരുന്നതായും മാമുക്കോയയുടെ മകനും പ്രതികരിച്ചിരുന്നു. അനാവശ്യവിവാദങ്ങൾ ഒഴിവാക്കണമെന്നായിരുന്നു കുടുംബത്തിന്റെ പ്രതികരണം.