ജി സുധാകരൻ പാർട്ടി വിടാൻ പാടില്ലായിരുന്നുവെന്ന് യു പ്രതിഭ; 'ആലപ്പുഴയിൽ തെരഞ്ഞെടുപ്പിനെ ബാധിക്കില്ല'

പാർട്ടി നൽകിയത് വലിയ ഉത്തരവാദിത്വം ആണെന്നും പാർട്ടിക്ക് തന്നിലുള്ള വിശ്വാസം നിലനിർത്തിപോവണമെന്നാണ് ആ​ഗ്രഹമെന്നും പ്രതിഭ ഏഷ്യാനെറ്റ് ന്യൂസിനോട്

ആലപ്പുഴ: വിവാദങ്ങൾ തനിക്ക് കരുത്തു പകർന്നുവെന്ന് കായംകുളത്തെ ഇടത് സ്ഥാനാർഥി യു പ്രതിഭ. പാർട്ടി നൽകിയത് വലിയ ഉത്തരവാദിത്വം ആണെന്നും പാർട്ടിക്ക് തന്നിലുള്ള വിശ്വാസം നിലനിർത്തിപോവണമെന്നാണ് ആ​ഗ്രഹമെന്നും പ്രതിഭ പറഞ്ഞു. മൂന്നാം തവണയാണ് കായംകുളത്ത് യു പ്രതിഭ ജനവിധി തേടുന്നത്.

ഒരു വീട്ടമ്മയായി ഇരിക്കുകയാണെങ്കിൽ ആരും വിമർശനങ്ങൾ ഉന്നയിക്കില്ലെന്നും വലിയ ഉത്തരവാദിത്വമാണ് കാലങ്ങളായി ചെയ്തു കൊണ്ടിരിക്കുന്നതെന്നും പ്രതിഭ പറഞ്ഞു. സ്വാഭാവികമായി ഇത് കരുത്ത് നൽകും. വിമർശനങ്ങൾ ചെറിയ സമയത്തേക്ക് വിഷമിപ്പിച്ചേക്കാം. അസത്യങ്ങൾ അധികകാലം പ്രചരിപ്പിക്കാൻ ആവില്ല. പൊതുപണം ഒരിക്കലും ദുർവിനിയോ​ഗം ചെയ്തിട്ടില്ല. വ്യാജപ്രചരണങ്ങൾ ആർക്കും നടത്താമെന്നും പ്രതിഭ പറഞ്ഞു.

ജി സുധാകരൻ പാർട്ടി വിട്ടത് ആലപ്പുഴയിൽ തെരഞ്ഞെടുപ്പിനെ ബാധിക്കില്ല. പാർട്ടി ജില്ലാ സെക്രട്ടറി അതിന് മറുപടി പറഞ്ഞിട്ടുണ്ട്. സുധാകരൻ പാർട്ടി വിടാൻ പാടില്ലായിരുന്നു. ആരും പാർട്ടി വിടുന്നതിനോട് ഞാനിഷ്ടപ്പെടാറില്ല. ഒരാളുടെ മാത്രം വിജയമല്ല, കൂട്ടമായ ആളുകളുടെ വിജയമാണെന്നും പ്രതിഭ പറയുന്നു.