യുഡിഎഫ് ഏകോപന സമിതി യോഗം കൊച്ചിയിൽ, കുഞ്ഞാലിക്കുട്ടിക്കെതിരായ സുധാകരന്‍റെ പരാമ‍ർശത്തിൽ ലീഗിന് അതൃപ്തി

കെപിസിസി പ്രസിഡന്‍റ് കെ സുധാകരന്‍റെ ആദ്യപരസ്യ നിലപാട് ലീഗ് കേന്ദ്രങ്ങളിൽ കടുത്ത അതൃപ്തി ഉണ്ടാക്കിയിരുന്നു. ഇക്കാര്യം ലീഗ് ഇന്ന് യോഗത്തിൽ ഉന്നയിക്കും

കൊച്ചി : യുഡിഎഫ് ഏകോപനസമിതി യോഗം ഇന്ന് കൊച്ചിയിൽ. അരിയിൽ ഷുക്കൂർ കേസുമായി ബന്ധപ്പെട്ട് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടിക്കെതിരായ ആരോപണം കത്തിനിൽക്കെയാണ് യുഡിഎഫ് സംസ്ഥാന ഏകോപന സമിതി യോഗം ഇന്ന് കൊച്ചിയിൽ ചേരുന്നത്. ഇക്കാര്യത്തിൽ കെപിസിസി പ്രസിഡന്‍റ് കെ സുധാകരന്‍റെ ആദ്യപരസ്യ നിലപാട് ലീഗ് കേന്ദ്രങ്ങളിൽ കടുത്ത അതൃപ്തി ഉണ്ടാക്കിയിരുന്നു. ഇക്കാര്യം ലീഗ് ഇന്ന് യോഗത്തിൽ ഉന്നയിക്കും. 

എ കെ  ആന്‍റണിയുടെ മൃദു ഹിന്ദുത്വ പരാമർശവുമായി ബന്ധപ്പെട്ട് കോൺഗ്രസ് നേതാക്കൾ വ്യത്യസ്ത അഭിപ്രായങ്ങൾ പറഞ്ഞതിലും ഘടക കക്ഷികൾക്ക് അതൃപ്തിയുണ്ട്. ഇ പി ജയരാജനുമായി ബന്ധപ്പെട്ട അനധികൃത സ്വത്ത് വിഷയത്തിൽ അടക്കം സർക്കാരും സിപിഎമ്മും പ്രതിക്കൂട്ടിൽ നിൽക്കെ രാഷ്ട്രീയമായി അതിനെ വേണ്ട രീതിയിൽ ഉപയോഗിക്കാൻ കഴിയുന്നില്ലെന്ന തോന്നൽ കോൺഗ്രസിലും ഘടക കക്ഷികളിലുമുണ്ട്. സർക്കാരിനെതിരായ നിലപാടിലടക്കം ഐക്യത്തോടെ  മുന്നോട്ട് പോകണമെന്ന നിർദ്ദേശമാകും കോൺഗ്രസ്സിൽ നിന്നും ഘടക കക്ഷികളിൽ നിന്നും യോഗത്തിൽ ഉയരുക.