നാളെ വിജയദശമി; വിദ്യാരംഭ ചടങ്ങുകൾക്കായി അക്ഷരമുറ്റങ്ങൾ ഒരുങ്ങി, ആയിരക്കണക്കിന് കുരുന്നുകൾ ആദ്യക്ഷരം കുറിക്കും

നവരാത്രി ആഘോഷങ്ങളുടെ പൂർണ്ണത കുറിച്ചുകൊണ്ട് നാളെ വിജയദശമി

തിരുവനന്തപുരം: നവരാത്രി ആഘോഷങ്ങളുടെ പൂർണ്ണത കുറിച്ചുകൊണ്ട് നാളെ വിജയദശമി. അറിവിന്‍റെയും വിദ്യയുടെയും ലോകത്തേക്ക് കുരുന്നുകൾ ചുവടുവെക്കുന്ന വിദ്യാരംഭ ചടങ്ങുകൾക്കായി സംസ്ഥാനത്തെ പ്രമുഖ ക്ഷേത്രങ്ങളും സാംസ്കാരിക കേന്ദ്രങ്ങളും പൂർണ്ണമായി സജ്ജമായി. മഹാനവമി ദിനമായ ഇന്ന് നാടെങ്ങുമുള്ള ക്ഷേത്രങ്ങളിൽ വൻ ഭക്തജനത്തിരക്കാണ് അനുഭവപ്പെട്ടത്. പൂജവെപ്പിന് ശേഷം വിജയദശമി നാളിൽ പുലർച്ചെ മുതൽ പൂജെയെടുപ്പും തുടർന്ന് വിദ്യാരംഭ ചടങ്ങുകളും നടക്കും.

വിദ്യാദേവിയായ മൂകാംബികയുടെ സന്നിധാനമായ കൊല്ലൂരിൽ ഭക്തജനനിബിഡമായ അന്തരീക്ഷമാണ്. മഹാനവമി ദിനത്തിലെ പ്രധാന ആചാരമായ പുഷ്പരഥോത്സവം ഇന്ന് ഭക്തിനിർഭരമായി നടന്നു. ദേവി വിഗ്രഹത്തെ മനോഹരമായി അലങ്കരിച്ച രഥത്തിലേറ്റിയുള്ള ശ്രീകോവിലിനു ചുറ്റുമുള്ള എഴുന്നള്ളത്ത് ദർശിക്കാൻ പതിനായിരക്കണക്കിന് ഭക്തരാണ് എത്തിയത്. നാളത്തെ വിദ്യാരംഭ ചടങ്ങുകൾക്കായി കൊല്ലൂരിൽ വിപുലമായ സജ്ജീകരണങ്ങളാണ് റെഗുലേറ്ററി കമ്മിറ്റിയും ക്ഷേത്ര ഭരണസമിതിയും ഒരുക്കിയിരിക്കുന്നത്.

വർഷത്തിൽ എല്ലാ ദിവസവും വിദ്യാരംഭം നടക്കുന്ന പ്രശസ്തമായ വടക്കൻ പറവൂർ മൂകാംബിക ദേവീക്ഷേത്രത്തിൽ വിജയദശമി ദിനത്തിലെ ഹരിശ്രീ കുറിക്കലിനായി വൻ ക്രമീകരണങ്ങളാണ് ഏർപ്പെടുത്തിയിരിക്കുന്നത്. പൂജപ്പുര സരസ്വതി ക്ഷേത്രത്തിൽ നാളെ പുലർച്ചെ 5:30-ഓടെ വിദ്യാരംഭ ചടങ്ങുകൾ ആരംഭിക്കും. പൂജപ്പുരയ്ക്ക് പുറമെ ഐരാണിമുട്ടം തുഞ്ചൻ സ്മാരകം, വൈലോപ്പിള്ളി സംസ്‌കൃതി ഭവൻ എന്നിവിടങ്ങളിലും വിദ്യാരംഭം നടക്കും.

മലപ്പുറം തിരൂരിലെ അക്ഷരമുറ്റമായ തുഞ്ചൻ പറമ്പിൽ പ്രമുഖ സാംസ്കാരിക നായകരുടെയും എഴുത്തുകാരുടെയും നേതൃത്വത്തിൽ കുട്ടികളെ എഴുത്തിനിരുത്താൻ വൻ തയാറെടുപ്പുകളാണ് പൂർത്തിയായിരിക്കുന്നത്. സംസ്ഥാനത്തെ പ്രധാനപ്പെട്ട എല്ലാ സരസ്വതി ക്ഷേത്രങ്ങളിലും വിദ്യാരംഭ ചടങ്ങുകൾക്കായി പ്രത്യേക പന്തലുകളും തിരക്ക് നിയന്ത്രിക്കാനുള്ള പോലീസ് സുരക്ഷയും സൗകര്യങ്ങളും ഏർപ്പെടുത്തിയിട്ടുണ്ട്.