സഹപ്രവർത്തകനോട് റൂമിലെത്താൻ ആവശ്യപ്പെട്ടു, ആശുപത്രിയിലേക്ക് പോകാനൊരുങ്ങുമ്പോൾ കുഴഞ്ഞു വീണു, വില്ലേജ് ഓഫീസർക്ക് ജീവൻ നഷ്ടമായി

മലപ്പുറം എളങ്കൂര്‍ വില്ലേജ് ഓഫീസർ കുഴഞ്ഞു വീണ് മരിച്ചു, എരുമേലി ചാത്തന്‍തറ സ്വദേശി കെ കെ രാജുവാണ് മരിച്ചത്

മലപ്പുറം: എളങ്കൂര്‍ വില്ലേജ് ഓഫീസറും പത്തനംതിട്ട എരുമേലി ചാത്തന്‍തറ സ്വദേശിയുമായ കെ കെ രാജു (53) കുഴഞ്ഞുവീണ് മരിച്ചു. ഇന്നലെ രാവിലെ ഒമ്പതരയോടെയാണ് സംഭവം. പേലേപ്പുറത്തെ വില്ലേജ് ഓഫീ സിന് സമീപത്തെ വാടക ക്വാര്‍ട്ടേഴ്സിലാണ് താമസിച്ചിരുന്നത്. ശാരീരിക അസ്വസ്ഥതകള്‍ അനുഭവപ്പെട്ടതിനെ തുടര്‍ന്ന് സഹപ്രവര്‍ത്തകനോട് റൂമിലെത്താന്‍ ആവശ്യപ്പെട്ടിരുന്നു. ഇവരുമായി ആശുപത്രിയിലേക്ക് പോകാന്‍ നില്‍ക്കുന്നതിനിടെയാണ് വില്ലേജ് ഓഫീസർ കുഴഞ്ഞുവീണത്. ഉടനെ എളങ്കൂറിലെ സ്വകാര്യ ക്ലിനിക്കിലും പിന്നീട് മഞ്ചേരി ഗവ. മെഡിക്കല്‍ കോളേജ് ആശുപത്രിയിലും എത്തിച്ചെങ്കിലും രക്ഷിക്കാനായില്ല. നിയമസഭാ തെരഞ്ഞെടുപ്പിന്‍റെ എളങ്കൂര്‍ വില്ലേജ് സെക്ടറല്‍ ഓഫീസറായിരുന്നു. തിങ്കളാഴ്ച വില്ലേജിന് കീഴിലെ ബൂത്തുകള്‍ സജ്ജമാക്കുന്നതിനും മറ്റും അഹോരാത്രം പ്രവര്‍ത്തിച്ചു വരുന്നതിനിടെയാണ് അപ്രതീക്ഷിത വിയോഗം.