ആദ്യം പലഹാരം കഴിക്കാം, എന്നിട്ടാവാം വന്ന കാര്യം! പക്ഷെ എല്ലാം സിസിടിവി കണ്ടു, വിളിച്ച് അര മണിക്കൂറിലെത്തി മോഷ്ടാവിനെ പിടികൂടി പൊലീസ്

തിരുവാതുക്കലിലെ ബേക്കറിയിൽ രാത്രി രണ്ട് മണിക്ക് മോഷ്ടിക്കാൻ കയറിയ ആളെ അര മണിക്കൂ‌ർ കൊണ്ട് പിടികൂടി കേരള പൊലീസ്. സി സി ടി വി ദൃശ്യങ്ങളുടെ സഹായത്തോടെയാണ് മോഷ്ടാവിനെ പിടികൂടിയത്.

കോട്ടയം: തിരുവാതുക്കലിലെ ബേക്കറിയിൽ രാത്രി രണ്ട് മണിക്ക് മോഷ്ടിക്കാൻ കയറിയ ആളെ അര മണിക്കൂ‌ർ കൊണ്ട് പിടികൂടി കേരള പൊലീസ്. സി സി ടി വി വഴി ബേക്കറിയിൽ മോഷണം നടക്കുന്നുണ്ടെന്ന് അറിഞ്ഞ ഉടമ പൊലീസിനെ വിവരമറിയിക്കുകയായിരുന്നു. ബേക്കറിയിൽ കയറിയ മോഷ്ടാവ് ആദ്യം പലഹാരങ്ങൾ കഴിക്കുന്നത് ദൃശ്യങ്ങളിൽ കാണാം. ഇതിന് ശേഷമാണ് പണം വച്ചിരുന്ന കബോ‌ഡ് തുറന്ന് മോഷണം ആരംഭിക്കുന്നത്. വീടിനോട് ചേർന്നുള്ള ബേക്കറിയിലാണ് മോഷണ ശ്രമം ഉണ്ടായത്. മോഷണത്തിന്റെ ദൃശ്യങ്ങൾ ബേക്കറിയുടമ ഫേസ്ബുക്കിലൂടെ പോസ്റ്റ് ചെയ്തിട്ടുണ്ട്. കേരളാ പൊലീസിന്റെ ഔദ്യോ​ഗിക പേജിലും ദൃശ്യങ്ങൾ കൊടുത്തിട്ടുണ്ട്.

കടയുടമയുടെ ഫേസ്ബുക്ക് പോസ്റ്റ്:

കടയുടമയുടെ ഫേസ്ബുക്ക് പോസ്റ്റിന്റെ പൂർണ രൂപം:

'2025 August 17നു അതിരാവിലെ 2 മണിക്ക് കോട്ടയം തിരുവാതുക്കൽ' ഉള്ള എന്റെ വീടിനോട് ചേർന്ന ഞങ്ങളുടെ ബേക്കറിയിൽ മോഷ്ടിക്കാൻ കയറിയ കള്ളനെ, എന്റെ അച്ഛന്റെ ഒറ്റ ഫോൺ കാളിൽ തന്നെ, നിമിഷങ്ങൾക്കകം സ്ഥലത്തെത്തുകയും, മോഷ്ടാവിനെ സാഹസികമായി പിടികൂടുകയും ചെയ്ത, കോട്ടയം വെസ്റ്റ് പോലീസ് സ്റ്റേഷനിലെ Night Officer Manoj sir, Kottayam Control Station - Sunnymon Sir, Shyam Sir എന്നിവരുടെ കൃത്യ സമയത്തുള്ള ഇടപെടൽ, പൊതുജനങ്ങളുടെ ജീവനും സ്വത്തിനും ഉള്ള സംരക്ഷണം കേരള പോലീസ് ഉറപ്പാക്കുന്നുവെന്ന് ഒരിക്കൽ കൂടി തെളിയിക്കപ്പെടുകയാണ്.

കേരള പോലീസ്ന് ഒരു ബിഗ് സല്യൂട്ട് !!!!!

കേരള പോലീസ് emergency contact number - 112'- രോഹിത് രാജേന്ദ്രൻ