
തിരുവനന്തപുരം: രാജ്യത്തെ തലമുതിര്ന്ന കമ്മ്യൂണിസ്റ്റ് നേതാവ് വിഎസ് അച്യുതാനന്ദന് ഇന്ന് 96ാം ജന്മദിനം. കേരളത്തില് കമ്മ്യൂണിസ്റ്റ് പ്രസ്ഥാനം കെട്ടിപ്പടുക്കുന്നതില് മുഖ്യ പങ്കു വഹിച്ച വിഎസ്, 1964 ല് പാര്ട്ടി പിളര്ന്നപ്പോള് സിപിഎമ്മിനൊപ്പം ഉറച്ചുനിന്നു. 1964ല് ഇറങ്ങിപ്പോന്നവരില് ജീവിച്ചിരിക്കുന്ന നേതാവും വിഎസ് തന്നെ. നിലവില് ഭരണപരിഷ്കാര കമ്മീഷന് ചെയര്മാനാണ് വിഎസ്.
1923 ഒക്ടോബര് 20നാണ് വേലിക്കകത്ത് ശങ്കരന്റെയും അക്കമ്മയുടെയും മകനായി വിഎസിന്റെ ജനനം. നാല് വയസ്സുള്ളപ്പോള് അമ്മ മരിച്ചു. 11ാം വയസ്സില് അച്ഛനും മരിച്ചപ്പോള് പഠനം നിര്ത്തി ജോലിക്കിറങ്ങി. സഹോദരനൊപ്പം തയ്യല് ജോലിയും പിന്നീട് കയര് ഫാക്ടറിയിലും ജോലി ചെയ്തു. കയര് ഫാക്ടറിയിലെ തൊഴിലാളി ജീവിതമാണ് വിഎസിനെ നേതാവാക്കുന്നത്. 1946ലെ പുന്നപ്ര-വയലാര് സമരത്തില് പങ്കെടുത്ത വിഎസിന് കടുത്ത പൊലീസ് മര്ദ്ദനമേല്ക്കേണ്ടിവന്നു.
സിപിഎം സംസ്ഥാന സെക്രട്ടറി, മുഖ്യമന്ത്രി, പ്രതിപക്ഷ നേതാവ്, എല്ഡിഎഫ് കണ്വീനര് എന്നീ നിലകളില് പ്രവര്ത്തിച്ചു.
കഴിഞ്ഞ ദിവസം കോണ്ഗ്രസ് നേതാവ് കെ സുധാകരന് വിഎസ് അച്യുതാനന്ദനെ പരിഹസിച്ചിരുന്നു. 96ാം വയസ്സില് വറ്റിവരണ്ട തലച്ചോറിൽ നിന്ന് എന്ത് പരിഷ്കാരമാണ് വരുകയെന്നായിരുന്നു സുധാകരന്റെ പരിഹാസം. തുടര്ന്ന് മറുപടിയുമായി വിഎസും രംഗത്തെത്തി.
ജന്മനാ തലച്ചോറ് ശുഷ്കമായ ചില തലനരയ്ക്കാനനുവദിക്കാത്ത വൃദ്ധന്മാര് എന്റെ തലയോട്ടിയുടെ ഉള്ളളവ് വിശകലനം ചെയ്യുന്ന തിരക്കിലാണെന്നാണ് സുധാകരനുള്ള മറുപടിയായി വി എസ് ഫേസ്ബുക്കില് കുറിച്ചത്. പീഡനക്കേസിലെ തന്നെക്കാള് യുവാവായ പ്രതിയെ വിദേശത്തേക്ക് കടത്താന് സഹായിച്ച യുവ വൃദ്ധന്റെ ജല്പ്പനങ്ങള്ക്കല്ല, നാടിന്റെ വികസനത്തെക്കുറിച്ചാണ് ജനങ്ങള് കാതോര്ക്കുകയെന്നും വറ്റിവരണ്ട തലമണ്ടയില്നിന്ന് കറുത്ത ചായത്തിന്റെ മണമല്ലാതെ മറ്റൊന്നും പ്രതീക്ഷിക്കാനാവില്ലല്ലോയെന്നും വി എസ് പ്രതികരിച്ചു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam