പൊലീസിന് മുന്നറിയിപ്പുമായി മുൻ ഡിജിപി, കേസും അറസ്റ്റും എല്ലാം ക്രിമിനൽ നടപടിക്രമങ്ങൾ പാലിക്കാതെ, 'പ്രതി രക്ഷപ്പെട്ടു പോകും'

ഇ-മെയിൽ പരാതിയിൽ കേസെടുത്തതും വൈദ്യപരിശോധന നടത്താത്തതും പോലുള്ള പുതിയ ക്രിമിനൽ നിയമങ്ങളിലെ (ബിഎൻഎസ്എസ്) നടപടിക്രമങ്ങൾ പാലിക്കാത്തത് പ്രതിക്ക് രക്ഷപ്പെടാൻ വഴിയൊരുക്കുമെന്ന് അദ്ദേഹം ഫേസ്ബുക്ക് കുറിപ്പിൽ മുന്നറിയിപ്പ് നൽകി.

തിരുവനന്തപുരം: യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിനെതിരായ ബലാത്സംഗക്കേസിൽ പൊലീസ് സ്വീകരിച്ച നടപടിക്രമങ്ങളിലെ നിയമസാധുത ചോദ്യം ചെയ്ത് പരോക്ഷ കുറിപ്പുമായി മുൻ ഡിജിപി ടിപി സെൻകുമാർ. ക്രിമിനൽ നിയമങ്ങളിലെ പുതിയ മാറ്റങ്ങളും ബിഎൻഎസ് നടപടിക്രമങ്ങളും പാലിച്ചില്ലെങ്കിൽ പ്രതികൾ നിയമത്തിന് മുന്നിൽ നിന്ന് രക്ഷപ്പെടാൻ സാധ്യതയുണ്ടെന്ന് അദ്ദേഹം തന്റെ ഫേസ്ബുക്ക് കുറിപ്പിലൂടെ മുന്നറിയിപ്പ് നൽകി.

വിദേശത്തുനിന്നും ഇ-മെയിൽ വഴി ലഭിച്ച പരാതിയിൽ കേസ് രജിസ്റ്റർ ചെയ്ത രീതിയെ സെൻകുമാർ നിശിതമായി വിമർശിക്കുന്നു. ഭാരതീയ നാഗരിക് സുരക്ഷാ സംഹിത (ബിഎൻഎസ്എസ്) വകുപ്പ് 173(1)(ii) പ്രകാരം ഇ-മെയിൽ പരാതി ലഭിച്ചാൽ മൂന്ന് ദിവസത്തിനകം പരാതിക്കാരി നേരിട്ടെത്തി അതിൽ ഒപ്പിടേണ്ടതുണ്ട്. ഇത്തരത്തിൽ ഒപ്പിട്ടു നൽകാതെ എങ്ങനെയാണ് കേസ് രജിസ്റ്റർ ചെയ്തതെന്ന ചോദ്യമാണ് അദ്ദേഹം ഉയർത്തുന്നത്. പരാതിക്കാരിയെ നേരിട്ട് വിളിച്ചുവരുത്താൻ പോലീസ് റിപ്ലൈ മെയിൽ അയച്ചിട്ടുണ്ടോ എന്നും അദ്ദേഹം ചോദിക്കുന്നു.

നിയമവിരുദ്ധമായാണ് കേസ് രജിസ്റ്റർ ചെയ്തതെങ്കിൽ പോലും, അതിജീവിതയെ 24 മണിക്കൂറിനകം വൈദ്യപരിശോധനയ്ക്ക് വിധേയയാക്കണമെന്ന് ബിഎൻഎസ്എസ് വകുപ്പ് അനുശാസിക്കുന്നുണ്ട്. ഈ പരിശോധന നടത്താതെ പരാതി വിശ്വാസയോഗ്യമാണെന്ന് എങ്ങനെ ഉറപ്പിക്കാൻ കഴിയുമെന്നും അദ്ദേഹം കുറിപ്പിൽ വ്യക്തമാക്കുന്നു. വൈദ്യപരിശോധന പോലും നടത്താതെ വകുപ്പ് 35(1)(b) പ്രകാരം ഒരു പരാതിയെ വിശ്വസിക്കുന്നത് നിയമപരമായി നിലനിൽക്കില്ലെന്നും അദ്ദേഹം ചൂണ്ടിക്കാട്ടുന്നു.

അറസ്റ്റും റിമാൻഡും ചോദ്യം ചെയ്യപ്പെടുന്നു

അറസ്റ്റിന്റെ കാരണങ്ങൾ വ്യക്തമാക്കുന്ന വകുപ്പ് 47(1), കോടതിയുടെ റിമാൻഡ് നടപടികളെ സംബന്ധിക്കുന്ന വകുപ്പ് 187(1) എന്നിവ പാലിക്കപ്പെടുന്നതിലും അദ്ദേഹം സംശയം പ്രകടിപ്പിക്കുന്നു. മുഖ്യമന്ത്രിയോട് പരാതിക്കാരി നടത്തുന്ന പരിദേവനങ്ങൾ ഒരിക്കലും ക്രിമിനൽ നടപടിക്രമങ്ങൾക്ക് പകരമാവില്ലെന്നും അദ്ദേഹം പരിഹസിച്ചു. "ഈ നടപടിക്രമങ്ങൾ പാലിച്ചില്ലെങ്കിൽ കോഴി രക്ഷപ്പെട്ടുപോകും" എന്ന പ്രയോഗത്തിലൂടെ പ്രതി നിയമത്തിന്റെ പഴുതുകളിലൂടെ പുറത്തിറങ്ങാൻ സാധ്യതയുണ്ടെന്നാണ് മുൻ ഡിജിപി നൽകുന്ന സൂചന.