വൈശ്യയാണ്​ താരം; 98-ാം വയസിൽ സാമ്പത്തിക ശാസ്​ത്രത്തിൽ ബിരുദാനനന്തര ബിരുദം

പാറ്റ്​ന: പഠനത്തിന്​​ കാലവും പ്രായവും തടസമല്ലെന്നത്​ വെറും വർത്തമാനമല്ലെന്ന്​ തെളിയിക്കുകയാണ്​ രാജ്​കുമാർ വൈശ്യ എന്ന ഉത്തർപ്രദേശ്​ സ്വദേശി. പാറ്റ്​ന ആസ്ഥാനമായുള്ള നളന്ദ ഓപ്പൺ സർവകലാശാലയിൽ നിന്ന്​ സാമ്പത്തിക ശാസ്​ത്രത്തിൽ (ഇക്കണോമിക്​സ്​) എം.എ ബിരുദം നേടു​മ്പോള്‍ വൈശ്യയുടെ പ്രായം 98. തിങ്കളാഴ്ച അവസാന വർഷ പരീക്ഷാഫലം പ്രസിദ്ധീകരിച്ചപ്പോഴാണ്​ വൈശ്യയുടെ വിജയ വാർത്ത സർവകലാശാല അധികൃതർ തന്നെ പുറത്തുവിട്ടത്​.

വൈശ്യയുടെ ഉത്സാഹവും സമർപ്പണവും ഞെട്ടിക്കുന്നതായിരുന്നുവെന്നാണ്​ സർവകലാശാല രജിസ്​ട്രാർ എസ്​.പി സിൻഹ പറയുന്നത്​. 1938ൽ ആഗ്ര സർവകലാശാലയിൽ നിന്നാണ്​ വൈശ്യ ബിരുദം നേടിയത്​. പ്രായക്കൂടുതലി​ന്‍റെ ഒരു ആനുകൂല്യവും തേടാതെ മറ്റ്​ വിദ്യാർഥികളെപ്പോലെ തന്നെയാണ്​ വൈശ്യയും സർവകലാശാല പരിസരത്തെ കേന്ദ്രത്തിൽ പരീക്ഷ എഴുതിയതെന്ന്​ രജിസ്​ട്രാർ തന്നെ സാക്ഷ്യപ്പെടുത്തുന്നു. പ്രവേശനത്തിനുള്ള അപേക്ഷയുമായി സർവകലാശാല അധികൃതർ വൈശ്യയുടെ വീട്ടിൽ എത്തിയപ്പോൾ വൈശ്യ അതീവ സന്തോഷവാനായി കാണ​പ്പെട്ടു.

വീണ്ടും മാർക്ക്​ ഷീറ്റ്​ സമർപ്പിക്കാനായി പോവുകയാണെന്നും ഇത്​ മഹത്തായ സന്ദർഭമാണെന്നും രജിസ്​ട്രാർ പറഞ്ഞു. 1920ൽ ജനിച്ച വൈശ്യയുടെ മൂന്ന്​ മക്കളും ഇതിനകം കേന്ദ്ര സര്‍ക്കാര്‍ സർവീസിൽ നിന്ന്​ വർഷങ്ങൾക്ക്​ മുമ്പ്​ വിരമിച്ചുകഴിഞ്ഞു. വൈശ്യയുടെ വിജയവാർത്ത അറിഞ്ഞ്​ ചെറുമകൻ സന്തോഷം പ്രകടിപ്പിച്ച്​ മധുരവുമായി എത്തി അഭിനന്ദനം അറിയിച്ചു. സെക്കൻഡ്​ ക്ലാസോടെയാണ്​ വൈശ്യയുടെ വിജയം. അൽപ്പം കൂടെ നേരത്തെ പരീക്ഷ എഴുതിയിരുന്നെങ്കിൽ ഒന്നാം ക്ലാസോടെ വിജയിക്കാൻ കഴിയുമായിരുന്നുവെന്നാണ്​ വൈശ്യ പറയുന്നത്​.

പാറ്റ്​ന സർവകലാശാലയിലെ ഹിസ്​റ്ററി വിഭാഗം മുൻ മേധാവി കൂടിയായ മരുമകൾ പ്രഫ. ഭാരതി എസ്​. കുമാറിന്​ വൈശ്യ പ്രത്യേകം നന്ദി പറയുന്നു. സ്​ഥിരമായി തനിക്കൊപ്പം നിൽക്കുകയും പഠനത്തിന്​ തടസം വരാതിരിക്കാൻ മരുമകൾ സ്​ഥിരമായുള്ള സീരിയൽ, സിനിമ എന്നിവ കാണൽ ഉപേക്ഷിക്കുകയും ചെയ്​തെന്നും വൈശ്യ പറയുന്നു.

ദാരിദ്ര്യം, തൊഴിലില്ലായ്​മ തുടങ്ങിയ സാമൂഹിക പ്രശ്​നങ്ങളിൽ ലേഖനങ്ങളും വൈശ്യ എഴുതുന്നുണ്ട്​. വിദ്യാഭ്യാസം നേടൽ ഒരു ദൗത്യമായി എടുക്കാൻ വൈശ്യ മക്കളെ പ്രോത്സാഹിപ്പിക്കുമായിരുന്നുവെന്ന്​ മരുമകൾ പറയുന്നു. ഈ സമയത്ത്​ മൊത്തം സമൂഹത്തിന്​ മാതൃകാ പുരുഷനായി അദ്ദേഹം മാറിയെന്നും അവർ പറഞ്ഞു.