ജലദോഷം വരാതിരിക്കാൻ ഇവ കഴിച്ചാൽ മതി

ജലദോഷമുള്ളപ്പോള്‍ ചൂടുള്ള ചുക്ക്‌ കാപ്പി കുടിക്കുന്നത്‌ ആശ്വാസം നല്‍കും ജലദോഷം വരുന്നതിന് മുമ്പ് ഉപ്പിട്ട ചൂട് വെള്ളം കുടിക്കുന്നത് നല്ലതാണ്​

തണുപ്പ് വന്നാൽ എല്ലാവരും പേടിക്കുന്നത് ജലദോഷത്തെയാണ്. വീട്ടിൽ ഒരാൾക്ക് ജലദോഷം വന്നാൽ പിന്നെ എല്ലാവർക്കും പിടിപ്പെടും. ജലദോഷം കൊണ്ടുള്ള അസ്വസ്ഥത ആദ്യം മൂക്കിലാണ്‌ തുടങ്ങുന്നതെങ്കിലും പതുക്കെ ശരീരം മുഴുവന്‍ ഇത്‌ ബാധിക്കും. മൂക്കൊലിപ്പ്‌, ശ്വാസം മുട്ടല്‍, തൊണ്ട വേദന, ചുമ,പനി, ശരീര വേദന എന്നിവയാണ്‌ സാധാരണ ജലദോഷത്തിന്റെ ലക്ഷണങ്ങള്‍.  

പനി ബാധിക്കുന്നവരുടെ ശരീരം പെട്ടെന്ന്‌ ദുര്‍ബലമാവും. മഴയും തണുപ്പുമെത്തിയാല്‍ ജലദോഷത്തെ നമുക്ക്‌ അവഗണിക്കാന്‍ പറ്റില്ല. പലപ്പോഴും മരുന്നുകള്‍ക്ക്‌ പൂര്‍ണമായി ആശ്വാസം നല്‍കാനാവില്ല. അതിനാല്‍ രോഗം വന്നിട്ട്‌ ചികിത്സിക്കുന്നതിനേക്കാള്‍ അത്‌ വരാതെ നോക്കുന്നതാണ്‌ കൂടുതല്‍ ഉചിതം. ജലദോഷം വരാതിരിക്കാൻ വീട്ടിൽ തന്നെ ചില വഴികളുണ്ട്.

‍‍1) ജലദോഷം വരുന്നതിന് മുമ്പ് ഉപ്പിട്ട ചൂട് വെള്ളം കുടിക്കുന്നത് നല്ലതാണ്. ജലദോഷം തുടങ്ങുന്നതിന്റെ ഒരു പ്രധാന ലക്ഷണമാണ്‌ തൊണ്ടവേദന. തൊണ്ട വേദന അനുഭപ്പെട്ടു തുടങ്ങുമ്പോള്‍ തന്നെ ചൂട്‌ വെള്ളത്തില്‍ അല്‍പം ഉപ്പിട്ട്‌ കവിള്‍ കൊള്ളുക. ഇത്‌ തൊണ്ട വേദന കുറയ്‌ക്കുന്നതിനും വൈറസിന്റെ തുടര്‍ ആക്രമണം ചെറുക്കുന്നതിനും സഹായിക്കും.

2) ജലദോഷം വരാൻ സാധ്യതയുണ്ടെന്ന് തോന്നിയാൽ ആദ്യം ചെയ്യേണ്ടത് ആവി പിടിക്കുക എന്നതാണ്. അടഞ്ഞ മൂക്ക്‌ തുറക്കുന്നതിനും മൂക്കിലെ രോഗാണുക്കള്‍ നശിക്കുന്നതിനും ഇത്‌ സഹായിക്കും. ജലദോഷം വന്നു കഴിഞ്ഞാണ്‌ ആവി പിടിക്കുന്നതെങ്കില്‍ ഏതെങ്കിലും ബാം പുരട്ടിയിട്ട്‌ ആവി പിടിയ്‌ക്കുന്നത്‌ കൂടുതല്‍ ആശ്വാസം നല്‍കും. ആവി പിടിക്കുമ്പോള്‍ ചൂട്‌ അധികമാകാതെ ശ്രദ്ധിക്കണം, ഇത്‌ മൂക്കിലെ കോശങ്ങള്‍ നശിക്കാന്‍ ചിലപ്പോള്‍ കാരണമാവും.

3) ജലദോഷമുള്ളപ്പോള്‍ ചൂടുള്ള ചുക്ക്‌ കാപ്പി കുടിക്കുന്നത്‌ ആശ്വാസം നല്‍കും.

4) കുറച്ച്‌ വെളുത്തുള്ളി അല്ലികള്‍ ഇട്ട്‌ വെള്ളം തിളപ്പിച്ചുണ്ടാക്കുന്ന വെളുത്തുള്ളി സൂപ്പ്‌ ജലദോഷത്തിന്റെ ശക്തി കുറയാന്‍ സഹായിക്കും. വെളുത്തുള്ളി രസത്തില്‍ ചേര്‍ത്ത്‌ കഴിക്കുന്നതും നല്ലതാണ്‌.

5) ഒരു സ്പൂൺ തേനും കറുകപ്പട്ടയും 1 സ്പൂൺ നാരങ്ങ നീരും ചേർത്ത് കഴിക്കുന്നത് ജലദോഷം വരാതിരിക്കാൻ സഹായിക്കും.

6) മഞ്ഞൾ പൊടി എല്ലാ അസുഖത്തിനുമുളള മരുന്നാണ്. ഒരു കപ്പ് പാലി‍ൽ അൽപം മഞ്ഞൾ പൊടി ചേർത്ത് കുടിക്കുന്നത് ജലദോഷം ചുമ എന്നിവ വരാതിരിക്കാൻ സഹായിക്കും. 

7) ഇഞ്ചിയും തേനും അൽപം തുളസിയിലയും ചേർത്ത് കഴിക്കുന്നത് ജലദോഷം മാറാൻ ​ഗുണകരമാണ്.