ബൈ ബൈ പിഗ്മെന്റേഷൻ! മങ്ങിയ ചർമ്മത്തോട് വിട പറയാൻ ചില വഴികൾ

ചർമ്മത്തിന്റെ സ്വാഭാവിക നിറം മാറി ചില ഭാഗങ്ങളിൽ കറുപ്പ്, തവിട്ടുനിറത്തിലുള്ള പാടുകൾ വരുന്ന അവസ്ഥയാണ് പിഗ്മെന്റേഷൻ. പലരേയും അലട്ടുന്ന ഒരു സൗന്ദര്യ പ്രശ്നമാണിത്. മുഖത്തും കഴുത്തിലുമാണ് ഇത് കൂടുതലായി കാണുന്നത്. ചർമ്മത്തിന് നിറം നൽകുന്ന 'മെലാനിൻ' എന്ന ഘടകത്തിന്റെ ഉത്പാദനം ചില ഭാഗങ്ങളിൽ അമിതമാകുമ്പോഴാണ് പിഗ്മെന്റേഷൻ ഉണ്ടാകുന്നത്. ഇതിന് പല കാരണങ്ങളുണ്ട്. സൂര്യനിൽ നിന്നുള്ള അൾട്രാവയലറ്റ് (UV) രശ്മികൾ ഏൽക്കുന്നത് മെലാനിൻ ഉത്പാദനം വർദ്ധിപ്പിക്കുന്നതാണ് ഇതിന്റെ പ്രധാന കാരണം. ഇതുകൂടാതെ ഗർഭകാലം, ചില മരുന്നുകളുടെ ഉപയോഗം, ഹോർമോൺ വ്യതിയാനങ്ങൾ തുടങ്ങിയ ഹോർമോൺ മാറ്റങ്ങളും, മുഖക്കുരു, മുറിവുകൾ, ചില സൗന്ദര്യ ചികിത്സകൾ എന്നിവയ്ക്ക് ശേഷം വരുന്ന പാടുകളായ പോസ്റ്റ്-ഇൻഫ്ലമേറ്ററി ഹൈപ്പർപിഗ്മെന്റേഷൻ , ജനിതകപരമായ കാരണങ്ങൾ എന്നിവയും പിഗ്മെന്റേഷനിലേക്ക് നയിക്കാം.

പിഗ്മെന്റേഷൻ കുറയ്ക്കാനും ചർമ്മം തിളക്കമുള്ളതാക്കാനും സഹായിക്കുന്ന ചില കാര്യങ്ങളുണ്ട്. പിഗ്മെന്റേഷൻ ഒഴിവാക്കാനുള്ള ഏറ്റവും പ്രധാനപ്പെട്ട വഴി സൂര്യരശ്മിയിൽ നിന്ന് സംരക്ഷണം നൽകുക എന്നതാണ്. പുറത്ത് പോകുമ്പോൾ SPF 30 അല്ലെങ്കിൽ അതിൽ കൂടുതലുള്ള സൺസ്ക്രീൻ നിർബന്ധമായും ഉപയോഗിക്കുകയും രണ്ട് മണിക്കൂറിൽ ഒരിക്കൽ ഇത് വീണ്ടും പുരട്ടുകയും ചെയ്യുന്നത് നല്ലതാണ്. മഴയുള്ള ദിവസങ്ങളിലും വീട്ടിലിരിക്കുമ്പോഴും സൺസ്ക്രീൻ ഉപയോഗിക്കുന്നത് ശീലമാക്കണം. കൂടാതെ കുടയും തൊപ്പിയും ഉപയോഗിച്ച് നേരിട്ടുള്ള സൂര്യപ്രകാശം ഏൽക്കുന്നത് പരമാവധി ഒഴിവാക്കുക.

ചില അടുക്കള ചേരുവകൾ പിഗ്മെന്റേഷൻ കുറയ്ക്കാൻ സഹായിക്കും

• ചന്ദനപ്പൊടി, പാൽ അല്ലെങ്കിൽ പനിനീർ അൽപം മഞ്ഞൾ എന്നിവ ചേർത്തുണ്ടാക്കുന്ന മിശ്രിതം പാടുകളുള്ള ഭാഗത്ത് പുരട്ടി 15-20 മിനിറ്റിനു ശേഷം കഴുകി കളയാവുന്നതാണ്.
• കറ്റാർ വാഴ ജെല്ലിൽ അടങ്ങിയിട്ടുള്ള 'അലോയിൻ' മെലാനിൻ ഉത്പാദനം കുറയ്ക്കാൻ സഹായിക്കുന്നതിനാൽ രാത്രി ഉറങ്ങുന്നതിന് മുൻപ് പാടുകളിൽ പുരട്ടി രാവിലെ കഴുകി കളയാം.
• തൈര് അല്ലെങ്കിൽ മോര് എന്നിവയിലുള്ള ലാക്റ്റിക് ആസിഡ് ചർമ്മത്തിലെ മൃതകോശങ്ങളെ നീക്കം ചെയ്യാനും പാടുകൾ മങ്ങാനും സഹായിക്കുന്നു.

ശ്രദ്ധിക്കേണ്ട ഒരു പ്രധാന കാര്യം, നാരങ്ങാനീര് പോലുള്ളവ പുരട്ടി പുറത്തിറങ്ങുന്നത് പാടുകൾ കൂടാൻ കാരണമാകും എന്നതുകൊണ്ട് ഇത്തരം പ്രകൃതിദത്ത ചേരുവകൾ ഉപയോഗിക്കുമ്പോൾ വീട്ടിൽ തന്നെ ഇരിക്കാൻ ശ്രമിക്കുക. കൂടാതെ, ഒരു പുതിയ ഉൽപ്പന്നം ഉപയോഗിക്കുന്നതിന് മുൻപ് കൈമുട്ടിലോ മറ്റോ പുരട്ടി അലർജി ഇല്ലെന്ന് ഉറപ്പാക്കണം.

പാടുകൾ കൂടുതലാണെങ്കിൽ ഒരു ചർമ്മരോഗ വിദഗ്ദ്ധനെ കാണുന്നത് നല്ലതാണ്. അവർ നിർദ്ദേശിക്കുന്ന ചികിത്സകളിൽ ടോപ്പിക്കൽ ക്രീമുകളായ ഹൈഡ്രോക്വിനോൺ, കോജിക് ആസിഡ്, അസെലൈക് ആസിഡ് തുടങ്ങിയ ചേരുവകൾ അടങ്ങിയ ക്രീമുകൾ, ചർമ്മത്തിന്റെ പുറംപാളി നീക്കം ചെയ്യുന്ന കെമിക്കൽ പീലിംഗ് , ചിലതരം പിഗ്മെന്റേഷന് വളരെ ഫലപ്രദമായ ലേസർ തെറാപ്പി എന്നിവ ഉൾപ്പെടുന്നു. സമീകൃതാഹാരം ചർമ്മത്തിന്റെ ആരോഗ്യത്തിന് അത്യാവശ്യമാണ്. വിറ്റാമിൻ സി, ഇ, എ എന്നിവ അടങ്ങിയ ആന്റിഓക്‌സിഡന്റുകൾ അടങ്ങിയ ഭക്ഷണങ്ങൾ (നെല്ലിക്ക, ഓറഞ്ച്, ഇലക്കറികൾ, നട്സുകൾ) ധാരാളം കഴിക്കുക. ദിവസവും ധാരാളം വെള്ളം കുടിച്ച് ചർമ്മം ഈർപ്പമുള്ളതായി നിലനിർത്തുകയും വേണം. സ്ഥിരമായ പരിചരണത്തിലൂടെയും ശരിയായ ചികിത്സയിലൂടെയും പിഗ്മെന്റേഷനോട് നിങ്ങൾക്ക് ധൈര്യമായി 'ബൈ ബൈ' പറയാൻ സാധിക്കും