'പക്കാ പെർഫക്റ്റ്' ആകേണ്ട... 'ഫിൽട്ടർ' വേണ്ട; എന്താണ് ഈ 'ഫിൻസ്റ്റാഗ്രാം'?

ഇൻസ്റ്റാഗ്രാമിലെ  സമ്മർദ്ദത്തിൽ നിന്ന് രക്ഷനേടാനായി ജെൻസി കണ്ടെത്തിയ പുതിയ ട്രെൻഡാണ് ‘ഫിൻസ്റ്റാഗ്രാം’. ഫിൽട്ടറുകളോ എഡിറ്റിംഗോ ഇല്ലാത്ത, അടുത്ത സുഹൃത്തുക്കൾക്ക് മാത്രം കാണാൻ കഴിയുന്ന, ഒരാളുടെ യഥാർത്ഥ ജീവിതം പങ്കുവെക്കാനുള്ള രണ്ടാമത്തെ അക്കൗണ്ടാണിത്. 

ഇന്ന് സോഷ്യൽ മീഡിയയിൽ ഒരു അക്കൗണ്ട് തുടങ്ങുക എന്നതിനർത്ഥം, ലോകത്തിന് മുന്നിൽ സ്വയം അവതരിപ്പിക്കാൻ ഒരു 'വിർച്വൽ പ്രൊഫൈൽ' സൃഷ്ടിക്കുക എന്നാണ്. അതിൽ ഏറ്റവും മുന്നിൽ നിൽക്കുന്ന പ്ലാറ്റ്‌ഫോമാണ് ഇൻസ്റ്റാഗ്രാം. എന്നാൽ, ഇൻസ്റ്റാഗ്രാം ഒരു 'പിക്ചർ പെർഫെക്റ്റ്' ലോകമായി മാറിയതോടെ, യാഥാർത്ഥ്യത്തെ മൂടിവെച്ച് ഫിൽട്ടറുകളിലും എഡിറ്റുകളിലും ഒളിപ്പിക്കുന്നു. കൂടുതൽ ലൈക്കുകൾ, കൂടുതൽ ഫോളോവേഴ്‌സ്, പ്രൊഫഷണൽ ഇമേജ്... ഇതിനെല്ലാം വേണ്ടി നമ്മുടെ മെയിൻ ഇൻസ്റ്റാഗ്രാം അക്കൗണ്ട് ഒരു പരസ്യപ്പലക പോലെയായി. എന്നാൽ, ഈ സമ്മർദ്ദത്തിൽ നിന്ന് രക്ഷനേടാൻ ജെൻസി കണ്ടെത്തിയ പുതിയൊരു 'കൂൾ ട്രെൻഡ്' ആണ് ഇപ്പോൾ വൈറലാകുന്നത്: 'ഫിൻസ്റ്റാഗ്രാം' അഥവാ 'ഫിൻസ്റ്റ'.

എന്താണ് ഈ 'ഫിൻസ്റ്റ' അക്കൗണ്ട്?

പേര് സൂചിപ്പിക്കുന്നത് പോലെ, 'ഫിൻസ്റ്റ' എന്നത് 'ഫേക്ക് ഇൻസ്റ്റാഗ്രാം' എന്നതിൻ്റെ ചുരുക്കപ്പേരാണ്. പക്ഷെ ഇത് 'വ്യാജ'നല്ല, മറിച്ച് നമ്മുടെ യഥാർത്ഥ സ്വത്വം ഒളിച്ചുവെക്കാത്ത രണ്ടാമത്തെ ഇൻസ്റ്റാഗ്രാം അക്കൗണ്ടാണ്. പ്രധാന അക്കൗണ്ടിൽ പ്രൊഫഷണൽ ലുക്കും മനോഹരമായ ചിത്രങ്ങളും പോസ്റ്റ് ചെയ്യുമ്പോൾ, ഈ 'ഫിൻസ്റ്റ' അക്കൗണ്ടുകൾ ഒരു ചെറിയ കൂട്ടം ആളുകൾക്ക് അതായത്, ഏറ്റവും അടുത്ത സുഹൃത്തുക്കൾക്കും കുടുംബാംഗങ്ങൾക്കും വേണ്ടി മാത്രമുള്ള സ്വകാര്യ ഇടമാണ്.

സമ്മർദ്ദത്തിൽ നിന്നുള്ള മോചനം

ഇൻസ്റ്റാഗ്രാം ആദ്യകാലത്ത് ചിത്രങ്ങൾ മനോഹരമാക്കുന്ന 'ഫിൽട്ടറുകൾ' കൊണ്ടാണ് ശ്രദ്ധേയമായത്. എന്നാൽ കാലക്രമേണ, കാഴ്ചയിൽ അതിഗംഭീരം എന്ന് തോന്നുന്ന ചിത്രങ്ങൾ പോസ്റ്റ് ചെയ്യാനും ഫോളോവേഴ്‌സിൻ്റെ എണ്ണം വർദ്ധിപ്പിക്കാനുമുള്ള ഒരു മത്സരം അവിടെ തുടങ്ങി. ഓരോ പോസ്റ്റും നൂറ് ശതമാനം തികഞ്ഞതായിരിക്കണം എന്ന ചിന്ത യുവതലമുറയിൽ വലിയ മാനസിക സമ്മർദ്ദമുണ്ടാക്കി.

ഇവിടെയാണ് ഫിൻസ്റ്റ ഒരു 'ആശ്വാസമായി മാറുന്നത്.

• ഫിൽട്ടറില്ല, എഡിറ്റില്ല: ഇവിടെ പോസ്റ്റ് ചെയ്യുന്ന ചിത്രങ്ങൾക്ക് ഫിൽട്ടറുകളോ എഡിറ്റിംഗോ നിർബന്ധമില്ല. ചിതറിത്തെറിച്ച മുടിയോ, ഉറക്കം തൂങ്ങിയ മുഖമോ, ഭക്ഷണം കഴിക്കുമ്പോൾ അറിയാതെ എടുത്ത ചിത്രങ്ങളോ ആകാം.
• റിയൽ യൂ: ഇത് നിങ്ങളുടെ 'റിയൽ സെൽഫിനെ' യഥാർത്ഥ നിങ്ങളെ അവതരിപ്പിക്കാനുള്ള വേദിയാണ്. ഇൻസ്റ്റാ ഫീഡ് മോശമാകുമോ എന്ന ഭയം ഇല്ലാതെ, തമാശകളും അബദ്ധങ്ങളും പങ്കുവെക്കാം.
• സ്വകാര്യതയാണ് പ്രധാനം: ഫിൻസ്റ്റ അക്കൗണ്ടുകൾ പൊതുവെ പ്രൈവറ്റ് ആയിരിക്കും. കൂടാതെ, ഫോളോവേഴ്‌സിൻ്റെ എണ്ണം വളരെ കുറവായിരിക്കും.

പ്രൊഫഷണൽ Vs. പേഴ്സണൽ

ഇന്നത്തെ പല ആളുകൾക്കും അവരുടെ മുഖ്യ ഇൻസ്റ്റാഗ്രാം അക്കൗണ്ട് കരിയറുമായി ബന്ധപ്പെട്ടോ സോഷ്യൽ ഇമേജുമായി ബന്ധപ്പെട്ടോ വൃത്തിയായി സൂക്ഷിക്കേണ്ടത് അത്യാവശ്യമാണ്. അതുകൊണ്ടുതന്നെ, അവരുടെ യഥാർത്ഥ ജീവിതത്തിലെ തമാശകളോ, അല്ലെങ്കിൽ 'പോസ്റ്റ് ചെയ്യാൻ കൊള്ളാത്ത' നിമിഷങ്ങളോ അവിടെ പങ്കുവെക്കാൻ കഴിയില്ല.

ചുരുക്കത്തിൽ, ഇൻസ്റ്റാഗ്രാമിലെ 'സോഷ്യൽ മാസ്ക്' അഴിച്ചുമാറ്റാനും, തങ്ങളുടെ കുറവുകളോടും കുഴപ്പങ്ങളോടും കൂടി സ്വയം അംഗീകരിക്കാനുമുള്ള ജെൻ സികളുടെ ബോധപൂർവമായ ഒരു നീക്കമാണ് ഈ ഫിൻസ്റ്റാഗ്രാം ട്രെൻഡ്. ഇൻ്റർനെറ്റിൽ എപ്പോഴും 'തികഞ്ഞ വ്യക്തി'യായി അഭിനയിച്ചു തളർന്നവർക്ക്, തങ്ങളുടെ യഥാർത്ഥ ലോകം ഓൺ‌ലൈനിൽ കൊണ്ടുവരാൻ ഫിൻസ്റ്റ നല്ലൊരു തുടക്കമാണ് നൽകുന്നത്.