മൊബൈൽ സ്ക്രീനിലെ പ്രണയബന്ധങ്ങൾ: ആരാണ് ജെൻ സികളുടെ ഡേറ്റിംഗ് നിയമങ്ങൾ എഴുതുന്നത് ?

ജെൻ സികളുടെ പ്രണയ ലോകം പരമ്പരാഗത രീതികളിൽ നിന്ന് ഏറെ മാറിയതായി 'ദ ഗാർഡിയൻ' റിപ്പോർട്ട് ചെയ്യുന്നു. മില്ലേനിയൽസിനെ അപേക്ഷിച്ച് ലൈംഗികബന്ധങ്ങളിൽ കുറവ് വരുന്ന 'സെക്‌സ് റിസഷൻ' ആണ് പ്രധാന സവിശേഷത.  

വർഷം 2025. കൗമാരവും യൗവനവും ഇഴചേരുന്ന ഈ കാലഘട്ടം പഴയ തലമുറ സങ്കൽപ്പിച്ചതുപോലെയല്ല. ഡേറ്റിംഗ് ആപ്പുകളിൽ വിരൽചലിപ്പിച്ചും, എഐ-യോട് ഉപദേശം തേടിയും, രാഷ്ട്രീയ നിലപാടുകൾ തുറന്നു പറഞ്ഞും ജെൻ സി എന്ന ഈ യുവതലമുറ ബന്ധങ്ങൾ, പ്രണയം, ലൈംഗികത എന്നിവയുടെ ലോകം തിരുത്തിയെഴുതുകയാണ്. മുൻതലമുറയായ മില്ലേനിയൽസിൻ്റെ 'കാഷ്വൽ സെക്‌സ്' യുഗത്തിൽ നിന്ന് മാറി, ജെൻ സി എത്തി നിൽക്കുന്നത് 'സെക്‌സ് റിസഷൻ' എന്നൊരു പ്രതിഭാസത്തിലാണ്. 'ദ ഗാർഡിയൻ' പുറത്തുവിട്ട ഡാറ്റാ റിപ്പോർട്ടിൽ പരാമർശിച്ച 13 സുപ്രധാന ഡാറ്റാ പോയിൻ്റുകൾ വിശദീകരിക്കുന്നു;

യുവാക്കളിൽ വർധിച്ചു വരുന്ന ഒറ്റപ്പെടൽ

ജെൻ സികളുടെ പ്രണയകഥകളിലെ പ്രധാന സവിശേഷത ലൈംഗികബന്ധങ്ങളിൽ അവർ കാണിക്കുന്ന വിമുഖതയാണ്. മില്ലേനിയൽസിനെ അപേക്ഷിച്ച് ജെൻ സികൾ ലൈംഗികബന്ധങ്ങളിൽ ഏർപ്പെടുന്നത് വളരെ കുറയുകയും, ലൈംഗിക ജീവിതം തുടങ്ങാൻ വൈകുകയും ചെയ്യുന്ന പ്രവണതയാണ് റിപ്പോർട്ചിൽ കാണുന്നത്.

എന്നാൽ, ഇതിലെ ലിംഗപരമായ വ്യത്യാസമാണ് ഞെട്ടിക്കുന്നത്:

18-നും 24-നും ഇടയിൽ പ്രായമുള്ള ജെൻ സി പുരുഷന്മാരിൽ മൂന്നിലൊരാൾക്കും ഇതുവരെ ഒരു പാർട്ണറുമായി ലൈംഗികബന്ധത്തിൽ ഏർപ്പെടാൻ കഴിഞ്ഞിട്ടില്ല എന്നാണ് റിപ്പോർട്ട് മുന്നോട്ടുവെയ്ക്കുന്നത്. എന്നാൽ സ്ത്രീകളിൽ ഇത് അഞ്ചിലൊരാൾ മാത്രമാണ്. ജെൻ സി പുരുഷന്മാരാണ് 'സിംഗിൾഡം' (ഒറ്റപ്പെടൽ) കൂടുതൽ അനുഭവിക്കുന്നതെന്നും റിപ്പോർട്ടുകൾ സൂചിപ്പിക്കുന്നു. ഈ ഡാറ്റ, 'സെക്സ് റിസഷൻ' എന്നൊരു അവസ്ഥയിലേക്ക് വിരൽ ചൂണ്ടുന്നു.

രാഷ്ട്രീയത്തിൻ്റെ കത്രികപ്പൂട്ട്: ഭയമാണ് പുതിയ വികാരം

ജെൻ സി പൊതുവെ പുരോഗമനപരമായ കാഴ്ചപ്പാടുകൾ വെച്ചുപുലർത്തുന്നവരാണ്. മൊത്തം മുതിർന്നവരിൽ 10% മാത്രം LGBTQ+ സ്വത്വം തുറന്നുപറയുമ്പോൾ, ജെൻ സികൾ ഏകദേശം നാലിലൊന്ന് (25%) പേർ മത്രമാണ് ഈ സ്വത്വം വെളിപ്പെടുത്തുന്നത്. ഇതിൽ ജെൻ സി വനിതകളാണ് മുൻപന്തിയിൽ. എന്നാൽ ഈ സ്വതന്ത്ര ചിന്തയ്ക്ക് കടിഞ്ഞാണിടാൻ യാഥാസ്ഥിതിക രാഷ്ട്രീയ നീക്കങ്ങൾ നടത്തുന്ന ശ്രമങ്ങൾ ഈ തലമുറയിൽ ഭയം സൃഷ്ടിക്കുന്നു.

നിയമപരമായ ഭയം: 'റോ വേഴ്സസ് വേഡ്' വിധി റദ്ദാക്കിയതുൾപ്പെടെയുള്ള സംഭവങ്ങൾ കാരണം 20% ജെൻ സി വനിതകൾ ലൈംഗിക ബന്ധത്തിൽ ഏർപ്പെടാൻ ഭയപ്പെടുന്നു. ഈ ഭയം പ്രത്യുത്പാദനപരമായ സ്വാതന്ത്ര്യങ്ങൾ നഷ്ടപ്പെടുമോ എന്ന ആശങ്കയിൽ നിന്ന് ഉടലെടുക്കുന്നതാണ്.

ഡേറ്റിംഗിലെ വിഭജനം: ഡേറ്റിംഗ് പോലുള്ള വ്യക്തിപരമായ കാര്യങ്ങളിൽ പോലും രാഷ്ട്രീയ നിലപാട് പ്രധാന ഘടകമാകുന്നു. ജെൻ സികളുടെ രാഷ്ട്രീയ കാഴ്ചപ്പാടുകളിലെ ധ്രുവീകരണം (ഉദാഹരണത്തിന്, 2024-ലെ തെരഞ്ഞെടുപ്പിൽ യുവതികളും യുവാക്കളും തമ്മിലുള്ള പോളിംഗ് വ്യത്യാസം) കാരണം, അവർ എതിർ രാഷ്ട്രീയമുള്ളവരെ ഡേറ്റ് ചെയ്യാൻ താൽപര്യപ്പെടുന്നില്ല. LGBTQ+ സ്വത്വം തുറന്നുപറയാൻ പോലും 44% പേരും ഡേറ്റിംഗിനിടെ മടി കാണിക്കുന്നു, ഇത് നിലവിലെ സാമൂഹിക സാഹചര്യങ്ങളുടെ പ്രതിഫലനമാണെന്ന് റിപ്പോർട്ട് ചൂണ്ടി കാണിക്കുന്നു.

വൺ-നൈറ്റ് സ്റ്റാൻഡിന് വിട: എഐ-യാണ് എല്ലാം

ജെൻ സികൾ പ്രണയ ബന്ധങ്ങളെ സമീപിക്കുന്ന രീതിയിൽ ശ്രദ്ധേയമായ മാറ്റങ്ങൾ വന്നിട്ടുണ്ട്. താൽക്കാലികവും കാഷ്വലുമായ ബന്ധങ്ങളോടുള്ള താൽപര്യം കുറയുകയും ദീർഘകാല ബന്ധങ്ങൾക്ക് മുൻഗണന നൽകുകയും ചെയ്യുന്നു.

അപ്രത്യക്ഷമാകുന്ന വൺ നൈറ്റ് സ്റ്റാൻഡുകൾ: 2004-ൽ മില്ലേനിയൽസിനിടയിൽ ഉണ്ടായിരുന്ന വൺ-നൈറ്റ് സ്റ്റാൻഡുകളുടെ തരംഗം, ജെൻ സികളുടെ കാലഘട്ടം എത്തുമ്പോൾ കുത്തനെ ഇടിഞ്ഞ് 23% മാത്രമായി ചുരുങ്ങി.

ഫസ്റ്റ് ഡേറ്റ് നിയമം: ആദ്യ ഡേറ്റിൽ ലൈംഗിക ബന്ധത്തിൽ ഏർപ്പെടുന്നത് 48% ജെൻ സികൾക്കും ഒരു ഡീൽബ്രേക്കറാണ്. അവർ ബന്ധങ്ങളിൽ വിശ്വാസത്തിനും വൈകാരികമായ അടുപ്പത്തിനും പ്രാധാന്യം നൽകുന്നു. ഡേറ്റിംഗ് ആപ്പുകളിൽ 'ഫസ്റ്റ് മുവ്' ചെയ്യാൻ 72% പേർക്കും മടിയാണ്. സാമൂഹികമായ ഇടപെടലുകളിലെ ഈ മാറ്റം ജെൻ സികളുടെ സവിശേഷതയായി മാറുന്നു.

ഈ ആശയക്കുഴപ്പങ്ങൾക്കിടയിൽ, ജെൻ സികൾ തങ്ങളുടെ പുതിയ കൂട്ടുകാരെ കണ്ടെത്തുന്നത് ആർട്ടിഫിഷ്യൽ ഇൻ്റലിജൻസിലാണ്. ഡേറ്റിംഗ് ഉപദേശങ്ങൾക്കോ, വൈകാരികമായ അടുപ്പത്തിനോ വേണ്ടി ജെനറേറ്റീവ് എഐ-യെയും ചാറ്റ്ബോട്ടുകളെയും ആശ്രയിക്കുന്ന ആദ്യ തലമുറയാണിത്. മനുഷ്യബന്ധങ്ങളിലെ സങ്കീർണ്ണതകളിൽ നിന്ന് ഒളിച്ചോടാൻ സാങ്കേതികവിദ്യ നൽകുന്ന ഈ എളുപ്പവഴി ജെൻ സികളുടെ ഡേറ്റിംഗ് ലോകത്തെ നിർവചിക്കുന്ന പ്രധാന ഘടകമാണ്.

ചുരുക്കത്തിൽ, ജെൻ സികളുടെ പ്രണയ ലോകം ഒറ്റപ്പെട്ടതും, തുറന്നതുമായ, എന്നാൽ എപ്പോഴും ഭയത്തിൻ്റെ നിഴലിൽ നിൽക്കുന്നതുമാണ്. ഈ തലമുറ തങ്ങളുടെ ജീവിത ലക്ഷ്യങ്ങൾക്കായി സ്വന്തം നിയമങ്ങൾ എഴുതുമ്പോൾ, അത് ഭാവിയിലെ ബന്ധങ്ങളുടെ രൂപരേഖ തന്നെ മാറ്റിമറിച്ചേക്കാം.