ബസ് സ്റ്റാന്‍റിൽ കയ്യാങ്കളി; കോഴിക്കോട് സ്വകാര്യ ബസിന്‍റെ ചില്ല് അടിച്ചു തകര്‍ത്തു, ഇരു ബസുകളും കസ്റ്റഡിയിലെടുത്ത് കസബ പൊലീസ്

കോഴിക്കോട്-മുക്കം-തിരുവമ്പാടി റൂട്ടിലെ സമയക്രമത്തെ ചൊല്ലി സ്വകാര്യ ബസ് ജീവനക്കാർ തമ്മിൽ തർക്കമുണ്ടായി. ഇതിന്റെ തുടർച്ചയായി പാളയം ബസ് സ്റ്റാൻഡിൽ വെച്ച് ഒരു ബസിന്റെ ചില്ല് അടിച്ചുതകർത്തു. സംഭവത്തിൽ കസബ പൊലീസ് ഇടപെട്ട് രണ്ട് ബസുകളും കസ്റ്റഡിയിലെടുത്തു.

കോഴിക്കോട്: പാളയം ബസ് സ്റ്റാന്‍ഡില്‍ സ്വകാര്യ ബസ് ജീവനക്കാര്‍ തമ്മിലുണ്ടായ തര്‍ക്കത്തിനൊടുവില്‍ ബസിന്‍റെ ചില്ല് അടിച്ചുതകര്‍ത്തു. ഇന്ന് രാവിലെ 7.15ഓടെയാണ് അനിഷ്ട സംഭവങ്ങളുണ്ടായത്. ഒടുവില്‍ കസബ പൊലീസ് സ്ഥലത്തെത്തി രണ്ട് ബസുകളും കസ്റ്റഡിയിലെടുത്തു.

കോഴിക്കോട് - മുക്കം - തിരുവമ്പാടി റൂട്ടില്‍ സര്‍വീസ് നടത്തുന്ന അസാറോ, മാധവം എന്നീ ബസുകളിലെ ജീവനക്കാര്‍ തമ്മിലാണ് തര്‍ക്കമുണ്ടായത്. സമയക്രമത്തെ ചൊല്ലി ഇരു ബസുകളിലെയും ജീവനക്കാര്‍ തമ്മില്‍ ചാത്തമംഗലത്ത് വെച്ച് വാക്കേറ്റമുണ്ടായിരുന്നു. ഇതിന് തുടര്‍ച്ചയായാണ് പാളയം ബസ് സ്റ്റാന്റില്‍ വച്ച് അതിക്രമമുണ്ടായത്. മാധവം ബസ്സിന്റെ ചില്ലാണ് തകര്‍ത്തത്. അസാറോ ബസിലെ ജീവനക്കാരൻ അതിക്രമം നടത്തിയെന്നാണ് പരാതി.