പോക്സോ കേസ് പ്രതിയായ വൈദികന്‍ ഒളിവില്‍

പെസഹാ വ്യാഴം ദിനത്തില്‍ കിടപ്പുരോഗികളായ വയോധികരെ കുമ്പസരിപ്പിക്കാനായി കോനൂരിലെ വീട്ടിലെത്തിയപ്പോഴായിരുന്നു സംഭവം

തൃശൂർ : പ്രായപൂര്‍ത്തിയാകാത്ത ആണ്‍കുട്ടിയെ പീഡിപ്പിച്ച കേസിലെ പ്രതിയായ വൈദികന്‍ ഒളിവില്‍. ഫാ.ജോസഫ് കൊടിയനെതിരെയാണ് പോലീസ് പോക്‌സോ കേസെടുത്തിരിക്കുന്നത്. പെസഹാ വ്യാഴം ദിനത്തില്‍ കിടപ്പുരോഗികളായ വയോധികരെ കുമ്പസരിപ്പിക്കാനായി വീട്ടിലെത്തിയപ്പോഴായിരുന്നു സംഭവം. വീട്ടില്‍ വയോധികരല്ലാതെ മറ്റാരും ഇല്ലാതിരുന്ന സമയത്തായിരുന്നു പീഡനം. വൈകീട്ടോടെ കുട്ടി അസ്വസ്ഥതകള്‍ കാട്ടിയതിനെ തുടര്‍ന്ന് വീട്ടുകാര്‍ കാര്യം തിരക്കിയപ്പോഴാണ് പീഡനവിവരം അറിയുന്നത്. തുടര്‍ന്ന് പള്ളിയിലും പൊലീസിലും വീട്ടുകാര്‍ പരാതി നല്കി. പരാതി വന്നതോടെ വൈദികന്‍ ഒളിവില്‍ പോയെന്നാണ് പോലീസ് പറയുന്നത്. മൂന്ന് വര്‍ഷം മുമ്പും ഈ വൈദികന്‍ മറ്റൊരു പോക്‌സോ കേസിലുള്‍പ്പെട്ട് ജയില്‍വാസം അനുഭവിച്ചിരുന്നതായും പറയുന്നു. വികാരിക്ക് വേണ്ടിയുള്ള അന്വേഷണം ഊര്‍ജ്ജിതമാക്കിയതായി പോലീസ് അറിയിച്ചു.