ചാവക്കാട്ടെ സൂപ്പർ മാർക്കറ്റിൽ നിന്നും ഒന്നേകാൽ കോടി രൂപ തട്ടിയെന്ന പരാതി; രണ്ട് ജീവനക്കാർ അറസ്റ്റിൽ

സൂപ്പർമാർക്കറ്റിൽ സീനിയർ അക്കൗണ്ടന്‍റും ക്യാഷ് ഹെഡ് ഓഫീസറുമായി ജോലി ചെയ്തിരുന്ന ഇരുവരും പല ദിവസങ്ങളിലായി സ്ഥാപനത്തിൽ കളക്ഷനായി ലഭിച്ച തുകയിൽ കൃത്രിമം കാട്ടിയെന്നാണ് പരാതി

തൃശൂർ: ചാവക്കാട്ട് എം കെ സൂപ്പർ മാർക്കറ്റിൽ നിന്നും കണക്കിൽ കൃത്രിമം കാട്ടി ഒന്നേകാൽ കോടി രൂപയുടെ തട്ടിപ്പ് നടത്തിയെന്ന പരാതിയിൽ രണ്ട് ജീവനക്കാർ അറസ്റ്റിൽ. പാവറട്ടി സ്വദേശി മുഹസിൻ, പുത്തൻകടപ്പുറം ചെങ്കോട്ട സ്വദേശി അജ്മൽ എന്നിവരെയാണ് ചാവക്കാട് പൊലീസ് അറസ്റ്റ് ചെയ്തത്. 

എം കെ സൂപ്പർ മാർക്കറ്റിൽ സീനിയർ അക്കൗണ്ടന്‍റും ക്യാഷ് ഹെഡ് ഓഫീസറുമായി ജോലി ചെയ്തിരുന്ന ഇരുവരും പല ദിവസങ്ങളിലായി സ്ഥാപനത്തിൽ കളക്ഷനായി ലഭിച്ച തുകയിൽ കൃത്രിമം കാട്ടിയെന്നാണ് പരാതി. ഓഡിറ്റ് നടത്തിയപ്പോൾ തട്ടിപ്പ് മനസ്സിലാക്കിയ സൂപ്പർ മാർക്കറ്റ് അധികൃതർ ചാവക്കാട് പൊലീസിൽ പരാതി നൽകുകയായിരുന്നു. ഇരുവരെയും കോടതിയിൽ ഹാജരാക്കി റിമാൻഡ് ചെയ്തു. 

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം