കൊല്ലത്ത് വയോധികയെ പഞ്ചായത്ത് സെക്രട്ടറി മർദ്ദിച്ചതായി പരാതി

പുരയിടത്തിന് മതിൽ കെട്ടുന്നത്തിനുള്ള പെർമിറ്റിനായി അപേക്ഷ നൽകിയിരുന്നുവെന്നും മൂന്ന് മാസമായി പഞ്ചായത്ത് ഓഫീസിൽ കയറിയിറങ്ങുകയാണെന്നും കൃഷ്ണകുമാരി പറഞ്ഞു.

കൊല്ലം: കൊല്ലം നെടുവത്തൂർ ഗ്രാമപഞ്ചായത്ത് ഓഫീസിൽ വയോധികയെ പഞ്ചായത്ത് സെക്രട്ടറി മർദ്ദിച്ചതായി പരാതി. കോട്ടാത്തല സ്വദേശിനി കൃഷ്ണകുമാരിയാണ് പരാതിക്കാരി. 

ഇന്ന് ഉച്ചയ്ക്കായിരുന്നു സംഭവം നടന്നത്. പുരയിടത്തിന് മതിൽ കെട്ടുന്നത്തിനുള്ള പെർമിറ്റിനായി അപേക്ഷ നൽകിയിരുന്നുവെന്നും മൂന്ന് മാസമായി പഞ്ചായത്ത് ഓഫീസിൽ കയറിയിറങ്ങുകയാണെന്നും കൃഷ്ണകുമാരി പറഞ്ഞു. സെക്രട്ടറിയെ ഉപരോധിക്കാൻ ശ്രമിച്ചപ്പോൾ കയ്യേറ്റം ചെയ്യുകയായിരുന്നുവെന്നാണ് വയോധികയുടെ ആരോപണം.

എന്നാൽ, കൃഷ്ണകുമാരി തന്നെ കയ്യേറ്റം ചെയ്യുകയായിരുന്നുവെന്നാണ് പഞ്ചായത്ത് സെക്രട്ടറിയുടെ വാദം. പൊതുമരാമത്ത് വകുപ്പിന്റെ റോഡിനോട് ചേർന്ന സ്ഥലമായതിനാൽ പി.ഡബ്ല്യു.ഡി.യുടെ അനുമതി ലഭിച്ചാലേ പെർമിറ്റ് നൽകാൻ കഴിയൂ എന്നാണ് സെക്രട്ടറി പറയുന്നത്. ഇരുകൂട്ടരും കൊട്ടാരക്കര പൊലീസിൽ പരാതി നൽകിയിട്ടുണ്ട്.