സച്ചി കവിതാ പുരസ്കാരം വിഷ്ണുപ്രിയക്ക്; അവാർഡ് 'ഇണക്കമുള്ളവരുടെ ആധി 'എന്ന കവിതാ സമാഹാരത്തിന്

സംവിധായകനും തിരക്കഥാകൃത്തുമായ സച്ചിയുടെ ഓർമ്മയ്ക്കായി ഏർപ്പെടുത്തിയ കവിതാ പുരസ്കാരം പി വിഷ്ണുപ്രിയക്ക് ലഭിച്ചു. 25,000 രൂപയും കീർത്തിമുദ്രയും അടങ്ങുന്ന പുരസ്കാരം സംവിധായകൻ കമൽ സമ്മാനിക്കും.

തൃശൂർ: ദേശീയ പുരസ്കാരം നേടിയ ചലച്ചിത്ര സംവിധായകനും തിരക്കഥാകൃത്തും ആയ സച്ചിയുടെ ഓർമയ്ക്കായി ഏർപ്പെടുത്തിയ കവിതാ പുരസ്കാരം യുവ കവയിത്രി പി വിഷ്ണുപ്രിയക്ക്. 'ഇണക്കമുള്ളവരുടെ ആധി 'എന്ന കൃതിയാണ് പുരസ്കാരത്തിനായി തെരഞ്ഞെടുക്കപ്പെട്ടത്.

സച്ചി സ്മാരക സമിതി മികച്ച മലയാള കവിതാ സമാഹാരത്തിന് 2022 മുതൽ പുരസ്കാരം നൽകി വരുന്നുണ്ട്. 25,000 രൂപയും കീർത്തിമുദ്രയും അടങ്ങുന്നതാണ് പുരസ്കാരം. കെ സച്ചിദാനന്ദൻ, പി എൻ ഗോപീകൃഷ്ണൻ , എസ് എം ജീവൻ ,എം. ഹരിദാസ് എന്നിവരടങ്ങിയ സമിതിയാണ് പുരസ്കാര നിർണ്ണയം നടത്തിയത്. ഡിസംബർ 27 ശനിയാഴ്ച വൈന്നേരെ 4.30 ന് സാഹിത്യ അക്കാദമി വൈലോപ്പിള്ളി ഹാളിൽ നടക്കുന്ന അനുസ്മരണത്തിൽ സംവിധായകൻ കമൽ പുരസ്കാരം സമ്മാനിക്കും.