എഐസിസി നേതാക്കൾ വിളിച്ച ഡിസിസി യോഗത്തിൽ നിന്ന് ജില്ലാ നേതാക്കളും എംഎൽഎമാരും വിട്ടുനിന്നു; കടുത്ത അതൃപ്തി വ്യക്തമാക്കി ദീപ ദാസ് മുൻഷി

എ.ഐ.സി.സി വിളിച്ചുചേർത്ത തിരുവനന്തപുരം ഡി.സി.സി യോഗത്തിൽ നിന്ന് പ്രമുഖ നേതാക്കളും എം.എൽ.എമാരും വിട്ടുനിന്നതിൽ എ.ഐ.സി.സി ജനറൽ സെക്രട്ടറി ദീപ ദാസ് മുൻഷി കടുത്ത അതൃപ്തി രേഖപ്പെടുത്തി. രാഹുൽ ഗാന്ധി നയിക്കുന്ന സമരപരിപാടികൾ ചർച്ച ചെയ്യാനാണ് യോഗം വിളിച്ചത്.

തിരുവനന്തപുരം: എ.ഐ.സി.സി നേതാക്കൾ വിളിച്ചുചേർത്ത തിരുവനന്തപുരം ഡി.സി.സി യോഗത്തിൽ നിന്ന് ജില്ലാ നേതാക്കളും എം.എൽ.എമാരും വിട്ടുനിന്നതിൽ കടുത്ത അതൃപ്തി വ്യക്തമാക്കി എ.ഐ.സി.സി ജനറൽ സെക്രട്ടറി ദീപ ദാസ് മുൻഷി. യോഗത്തിൽ കോൺഗ്രസ് എം.എൽ.എമാരും ഡി.സി.സി പ്രസിഡന്റും പങ്കെടുത്തിരുന്നില്ല. ഡൽഹിയിൽ നടക്കുന്ന നവംബർ 1 റാലിയും എസ് ഐ ആർ സമരവും ഉൾപ്പെടെയുള്ള കാര്യങ്ങൾ ചർച്ച ചെയ്യാനാണ് യോഗം വിളിച്ചുചേർത്തത്. എന്നാൽ ഡി.സി.സി, മണ്ഡലം, ബ്ലോക്ക് ഭാരവാഹികൾ ഉൾപ്പെടെ അമ്പതോളം പേർ മാത്രമാണ് യോഗത്തിന് എത്തിയത്.

രാഹുൽ ഗാന്ധി നയിക്കുന്ന പ്രധാന സമരപരിപാടികൾ ചർച്ച ചെയ്യാൻ വിളിച്ച യോഗത്തിൽ പ്രമുഖ നേതാക്കൾ പങ്കെടുക്കാതിരുന്നത് അംഗീകരിക്കാനാവില്ലെന്ന് ദീപ ദാസ് മുൻഷി വ്യക്തമാക്കി. മുതിർന്ന നേതാക്കളുടെ ഈ പിന്മാറ്റം എ.ഐ.സി.സി നേതൃത്വത്തെയും കേന്ദ്ര നേതാക്കളെയും അവഹേളിക്കുന്നതിന് തുല്യമാണെന്ന നിലപാടിലാണ് കേന്ദ്ര നേതൃത്വം.