ഫാ.കുര്യാക്കോസിന്‍റെ മരണത്തില്‍ ദുരൂഹതയുണ്ടെന്ന് കുടുംബം; ഡിവൈഎസ്പിക്ക് പരാതി നൽകി

 ബിഷപ്പ് ഫ്രാങ്കോ മുളയ്ക്കലിനെതിരെ പരാതി നൽകിയ വൈദികന്‍റെ മരണത്തില്‍ ദുരൂഹതയുണ്ടെന്ന് ആരോപിച്ച് ബന്ധുക്കൾ ചേർത്തല ഡിവൈഎസ്പിക്ക് പരാതി നൽകി. ജലന്ധർ രൂപതയിലെ വൈദികനായ ഫാ.കുര്യാക്കോസ് കാട്ടുതറ (60) യാണ് ഇന്നലെ മരിച്ചതായി ബന്ധുക്കൾക്ക് വിവരം ലഭിച്ചത്. ഇദ്ദേഹം ചേർത്തല പള്ളിപ്പുറം സ്വദേശിയാണ്.

ആലപ്പുഴ:  ബിഷപ്പ് ഫ്രാങ്കോ മുളയ്ക്കലിനെതിരെ പരാതി നൽകിയ വൈദികന്‍റെ മരണത്തില്‍ ദുരൂഹതയുണ്ടെന്ന് ആരോപിച്ച് ബന്ധുക്കൾ ചേർത്തല ഡിവൈഎസ്പിക്ക് പരാതി നൽകി. ജലന്ധർ രൂപതയിലെ വൈദികനായ ഫാ.കുര്യാക്കോസ് കാട്ടുതറ (60) യാണ് ഇന്നലെ മരിച്ചതായി ബന്ധുക്കൾക്ക് വിവരം ലഭിച്ചത്. ഇദ്ദേഹം ചേർത്തല പള്ളിപ്പുറം സ്വദേശിയാണ്.ബിഷപ്പിനെതിരെ പരാതി ഉന്നയിച്ച കന്യാസ്ത്രീയ്ക്ക് ഫാ. കുര്യാക്കോസ് സഹായങ്ങള്‍ നല്‍കുകയും ബിഷപ്പിനെതിരെ ശക്തമായ നിലപാടെടുക്കുകയും ചെയ്തിരുന്നു. ബിഷപ്പിനെതിരെ ഫാ. കുര്യാക്കോസ് പൊലീസില്‍ മൊഴി നല്‍കിയിരുന്നു. 

അദ്ദേഹത്തിന് ഗുണ്ടകളുടെ ഭീഷണിയുണ്ടായിരുന്നെന്നും താമസസ്ഥലത്തിനു നേരെ കല്ലെറിയുകയും വാഹനം തല്ലിപ്പൊളിക്കുകയും ചെയ്തിരുന്നതായും ബന്ധുക്കള്‍ ആരോപിച്ചു. മുമ്പ് കന്യാസ്ത്രീകളുടെ വൊക്കേഷണല്‍ ട്രെയിനര്‍ കൂടിയായിരുന്ന തന്നോട് കന്യാസ്ത്രീകള്‍ പലതവണ ബിഷപ്പിനെതിരെ പരാതിപ്പെട്ടിട്ടുണ്ടെന്നും ഇദ്ദേഹം പറഞ്ഞിരുന്നു. രൂപതയുടെ കീഴില്‍ കന്യാസ്ത്രീകള്‍ക്കായി മിഷണറീസ് ഓഫ് ജീസസ് സ്ഥാപിച്ച മുന്‍ ബിഷപ്പ് സിംഫോറിയന്‍ കീപ്പുറത്തിനൊപ്പം പ്രവര്‍ത്തിച്ച വൈദികന്‍ കൂടിയാണ് ഫാ. കുര്യാക്കോസ് കാട്ടുതറ.