പൊള്ളുന്ന ചൂട്, ദാഹിച്ച് വലഞ്ഞ് അലഞ്ഞുനടന്നു; ഒടുവിൽ കണ്ട പ്ലാസ്റ്റിക് പാത്രത്തിൽ തലയിട്ട നായ കുടുങ്ങി; ഫയർ ഫോഴ്സ് രക്ഷകരായി

തിരുവനന്തപുരത്ത് ആറ്റിങ്ങലിൽ വെള്ളം കുടിക്കാനായി പ്ലാസ്റ്റിക് പാത്രത്തിൽ തലയിട്ട നായയുടെ തല കുടുങ്ങി. ദിവസം മുഴുവൻ അലഞ്ഞുതിരിഞ്ഞ നായയെ, നാട്ടുകാർ വിവരമറിയിച്ചതിനെ തുടർന്ന് ഫയർഫോഴ്സ് സംഘം സ്ഥലത്തെത്തി പാത്രം മുറിച്ചുമാറ്റി രക്ഷപ്പെടുത്തി.

തിരുവനന്തപുരം : പൊള്ളുന്ന ചൂടിനിടെ വെള്ളംകുടിക്കാനായി പ്ലാസ്റ്റിക് പാത്രത്തിനുള്ളിൽ തലയിട്ട നായയുടെ കഴുത്തിൽ പാത്രം കുടുങ്ങി. കഴുത്തിൽ കുടുങ്ങിയ പാത്രവുമായി പകൽ മുഴുവൻ കറങ്ങിയ നായയ്ക്ക് ഒടുവിൽ ഫയർഫോഴ്സ് രക്ഷകരായി. ഇന്നലെ ആറ്റിങ്ങൽ ടിബി ജങ്ഷനു സമീപത്താണ് സംഭവം. പാത്രവും തലയിലിട്ട് ടിബി ജങ്ഷന് സമീപം ക്ലബ് റോഡിൽ അലയുന്നതുകണ്ട നാട്ടുകാരാണ് ആദ്യം നായയെ രക്ഷിക്കാൻ ശ്രമിച്ചത്. ഇവർ രാത്രിയോടെ ആറ്റിങ്ങൽ അഗ്നിരക്ഷാ നിലയത്തിൽ വിവരം അറിയിച്ചത്. തുടർന്ന് ഗ്രേഡ് അസിസ്റ്റൻ്റ് സ്റ്റേഷൻ ഓഫീസർ സി.ആർ മോഹനചന്ദ്രന്റെ നേതൃത്വത്തിൽ ഫയർ ഓഫീസർമാർ സ്ഥലത്തെത്തി. കട്ടർ ഉപയോഗിച്ച് പാത്രം മുറിച്ചു നീക്കിയാണ് ഫയർ ഫോഴ്സ് അംഗങ്ങൾ നായയെ രക്ഷിച്ചത്. കണ്ണ് കാണാനാവാതെ പരിഭ്രാന്തനായ നായയെ കയറുകൊണ്ട് കുടുക്കിട്ടു പിടിച്ച ശേഷമാണ് കട്ടർ ഉപയോഗിച്ച് പാത്രം മുറിച്ചുമാറ്റിയത്.