ജടായു പാറയിലെ പുതുവർഷ ആഘോഷം ഗവർണ്ണർ പി സദാശിവം ഉദ്ഘാടനം ചെയ്യും

തെരുവ് മാജിക് ഷോ, പൊയ്ക്കാൽ  നടത്തം, തനത് ഭക്ഷ്യമേള എന്നിവ എല്ലാ ദിവസവും ഉണ്ടായിരിക്കും.   

ചടയമംഗലം: ലോക ടൂറിസം ഭൂപടത്തില്‍ ഏറ്റവും വലിയ പക്ഷിശില്‍പ്പമെന്ന ഖ്യാതി സ്വന്തമാക്കിയ ചടയമംഗലത്തെ ജടായു എര്‍ത്ത്സ് സെന്ററില്‍ പുതുവർഷ ആഘോഷങ്ങൾ ഗവർണ്ണർ ജ പി സദാശിവം ഉദ്ഘാടനം ചെയ്യും.  നാളെ വൈകിട്ട് 5 മണിക്ക് നടക്കുന്ന ചടങ്ങിൽ മന്ത്രി കടകംപള്ളി സുരേന്ദ്രൻ അധ്യക്ഷനാകും.

എൽ ഈ ഡി ബലൂണുകൾ ആകാശത്തേക്ക് പറത്തിയാകും ജടായു പാറയില്‍ പുതുവർഷത്തെ വരവേൽക്കുന്നത്. പുതുവർഷ  ആഘോഷങ്ങളുടെ ഭാഗമായി രാത്രി 9 മണി മുതൽ പ്രശസ്ത ഗായിക അനിത ഷെയ്ഖ് നയിക്കുന്ന ഇൻഡിപോപ്പ് സംഗീതനിശയും അരങ്ങേറും. പുതുവർഷാഘോഷങ്ങളിൽ ഭാഗമാകുന്നതിന് പ്രത്യേക ടിക്കറ്റ് ഉണ്ട്.

ഈ മാസം 22ന് ആരംഭിച്ച ജടായു കാർണിവലിന്റെ ഭാഗമായി തെരുവ് മാജിക് ഷോ, പൊയ്ക്കാൽ  നടത്തം, തനത് ഭക്ഷ്യമേള എന്നിവ എല്ലാ ദിവസവും ഉണ്ടായിരിക്കും. ജടായു കാർണിവൽ ജനുവരി 22ന് സമാപിക്കും. എൻ കെ പ്രേമചന്ദ്രൻ എം പി,  ചടയമംഗലം എം എൽ എ മുല്ലക്കര രത്‌നാകരൻ, ചടയമംഗലം പഞ്ചായത്ത് പ്രസിഡന്റ് രാധാകൃഷ്ണൻ നായർ തുടങ്ങിയവര്‍ നാളത്തെ ചടങ്ങിൽ സന്നിഹിതരാകും.