ദേശീയപാത കരാർ കമ്പനിക്ക് 50,000 രൂപ പിഴയിട്ട് കൊടകര ഗ്രാമപഞ്ചായത്ത്; കാരണം അതിഥി തൊഴിലാളികളും ശുചിത്വമില്ലായ്മ
Synopsis
കൊടകരയിൽ ദേശീയപാത നിർമ്മാണ കമ്പനിയുടെ അതിഥി തൊഴിലാളി ക്യാമ്പിൽ ജില്ലാ എൻഫോഴ്സ്മെൻ്റ് സ്ക്വാഡ് നടത്തിയ പരിശോധനയിൽ ഗുരുതരമായ മാലിന്യ പ്രശ്നങ്ങൾ കണ്ടെത്തി.
തൃശൂര്: കൊടകര ഗ്രാമപഞ്ചായത്തില് ദേശീയപാത നിര്മ്മാണ കരാര് കമ്പനിയുടെ നേതൃത്വത്തില് അതിഥി തൊഴിലാളികള് താമസിക്കുന്ന സ്ഥലത്ത് ജില്ലാ എന്ഫോഴ്സ്മെന്റ് സ്ക്വാഡിന്റെ നേതൃത്വത്തില് പരിശോധന നടത്തി. ജൈവമാലിന്യങ്ങള് പുറത്ത് കൂട്ടിയിട്ടതായും അജൈവ മാലിന്യം വലിച്ചെറിഞ്ഞതായും ദ്രവമാലിന്യം തൊട്ടടുത്തുള്ള പാടശേഖരത്തേക്ക് ഒഴുക്കിവിടുന്നതായും കണ്ടെത്തി. പൊതു ശുചിത്വമില്ലായ്മയും പരിശോധനയില് കണ്ടു.
കേരള പഞ്ചായത്ത്രാജ് ആക്ടിലെ വിവിധ സെക്ഷനുകള് പ്രകാരം അമ്പതിനായിരം രൂപ പിഴ ചുമത്തി കരാര് കമ്പനി മാനേജര്ക്ക് നോട്ടീസ് നല്കി. കൂടാതെ വിവിധ വിദ്യാഭ്യാസ സ്ഥാപനങ്ങള്, വാണിജ്യ കേന്ദ്രങ്ങള്, ബാര് ഹോട്ടലുകള് എന്നിവിടങ്ങളിലും പരിശോധന നടത്തി. അശാസ്ത്രീയ മാലിന്യ സംസ്കരണം കണ്ടെത്തുകയും പല സ്ഥലങ്ങളിലും മാലിന്യം കൂട്ടിയിട്ട് കത്തിക്കുന്നതായും കണ്ടു.
വീഴ്ച പറ്റിയ സ്ഥാപനങ്ങള്ക്ക് വിവിധ സെക്ഷനുകള് പ്രകാരം പിഴ ചുമത്തി നോട്ടീസ് നല്കി. ആകെ 70000 രൂപ പിഴ ചുമത്തി. ജില്ലാ സ്ക്വാഡ് ടീം ലീഡര് രജിനേഷ് രാജന്, ടീം അംഗം രശ്മി പി.എസ്, കൊടകര ഗ്രാമപഞ്ചായത്ത് അസി. സെക്രട്ടറി സുനില് കുമാര്, ഹെല്ത്ത് ഇന്സ്പെക്ടര് ലിധിന് ദേവസി എന്നിവര് പരിശോധനയില് പങ്കെടുത്തു.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam