എട്ടോളം ക്രിമിനൽ കേസ്, നഗരത്തിലെ റൗഡിലിസ്റ്റിലും, പ്രതിയെ കാപ്പ ചുമത്തി നാടുകടത്തി

നിരവധി ക്രിമിനൽ കേസുകളിൽ പ്രതിയായ ഷിജു തമ്പി എന്ന യുവാവിനെ കേരള സാമൂഹിക വിരുദ്ധ പ്രവർത്തനങ്ങൾ (തടയൽ) നിയമപ്രകാരം തിരുവനന്തപുരം സിറ്റിയിൽ നിന്ന് നാടുകടത്തി. ഫോർട്ട്, പേട്ട പോലീസ് സ്റ്റേഷനുകളിലായി എട്ടോളം കേസുകളുള്ള ഇയാൾക്ക് സിറ്റി പോലീസ് കമ്മീഷണറുടെ ഉത്തരവ് പ്രകാരം നഗരത്തിൽ പ്രവേശിക്കുന്നതിന് വിലക്കേർപ്പെടുത്തി.

തിരുവനന്തപുരം: നിരവധി ക്രിമിനൽ കേസുകളിൽ പ്രതിയായ യുവാവിനെ കാപ്പ ചുമത്തി തിരുവനന്തപുരം സിറ്റി അതിർത്തിയിൽ നിന്ന് നാടുകടത്തി. മണക്കാട് കൊഞ്ചിറവിള കാലടി സൗത്ത് മുദ്രനഗർ സ്വദേശി ഷിജു തമ്പി (33) യെയാണ് കേരള സാമൂഹിക വിരുദ്ധ പ്രവർത്തനങ്ങൾ (തടയൽ) നിയമപ്രകാരം നടപടിക്കിരയാക്കിയത്.

ഫോർട്ട്, പേട്ട പൊലീസ് സ്റ്റേഷനുകളിലായി എട്ടോളം ക്രിമിനൽ കേസുകളിൽ പ്രതിയും ഫോർട്ട് പൊലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളുമാണ് ഷിജു തമ്പി. തിരുവനന്തപുരം സിറ്റി പൊലീസ് കമ്മീഷണർ അരുൾ ആർ. ബി. കൃഷ്ണ പുറപ്പെടുവിച്ച ഉത്തരവിന്‍റെ അടിസ്ഥാനത്തിലാണ് നടപടി. ഉത്തരവ് പ്രകാരം ഇയാൾക്ക് തിരുവനന്തപുരം സിറ്റി പൊലീസ് പരിധിയിൽ പ്രവേശിക്കുന്നതിന് വിലക്കേർപ്പെടുത്തിയിട്ടുണ്ട്.