കൊച്ചി തുറമുഖത്തെ വാര്‍ഫിൽ വൻ തീപിടുത്തം; കണ്‍വെയര്‍ ബെൽറ്റിന് തീപിടിച്ച് സള്‍ഫറിലേക്ക് പടര്‍ന്നു

കൊച്ചി തുറമുഖത്തെ എറണാകുളം വാർഫിൽ വൻ തീപ്പിടിത്തം. സൾഫർ കയറ്റുന്ന കൺവെയർ ബെൽറ്റിനാണ് തീ പിടിച്ചത്. ഫയര്‍ഫോഴ്സെത്തി തീ നിയന്ത്രണ വിധേയമാക്കി.

കൊച്ചി: കൊച്ചി തുറമുഖത്തെ എറണാകുളം വാർഫിൽ വൻ തീപ്പിടിത്തം. സൾഫർ കയറ്റുന്ന കൺവെയർ ബെൽറ്റിനാണ് തീ പിടിച്ചത്. പിന്നാലെ ഇത് ക്യൂ - 10 ഷെഡിനു സമീപം കുട്ടിയിട്ടിരുന്ന സൾഫറിലേക്കും പടർന്നു. കൊച്ചിയിലെ വിവിധ ഫയർസ്റ്റേഷനുകളിൽ നിന്നായി പത്തോളം യൂണിറ്റുകൾ എത്തിയാണ് തീ നിയന്ത്രണവിധേയമാക്കിയത്.

ആശങ്കപ്പെടേണ്ട സാഹചര്യമില്ലെന്നും തീ കൂടുതലിടത്തേക്ക് പടർന്നിട്ടില്ലെന്നും ജില്ല ഫയർ ഓഫിസർ കെ ഹരികുമാർ പറഞ്ഞു. തീ പടര്‍ന്ന സമയത്ത് തന്നെ തീ അണയ്ക്കാനായി. കൂടുതൽ സ്ഥലത്തേക്ക് പടര്‍ന്നിട്ടില്ലെന്ന് പരിശോധനയിൽ വ്യക്തമായി. എന്നാൽ മുൻകരുതലെന്ന നിലയിൽ പ്രദേശത്ത് ഫയര്‍ഫോഴ്സിന്‍റെ നിരീക്ഷണം തുടരുമെന്നും കെ ഹരികുമാര്‍ പറഞ്ഞു.