രാത്രി 7.30, വഴി ചോദിക്കാനെന്ന വ്യാജേന ഓട്ടോ നിർത്തി; സംസാരത്തിനിടെ വയോധികന്‍റെ പോക്കറ്റിലെ പണവും ഫോണും തട്ടിയെടുത്തു

കൊല്ലം എഴുകോണിൽ കടയിൽ പോയി മടങ്ങുകയായിരുന്ന 65കാരനെ തടഞ്ഞുനിർത്തി പണവും മൊബൈൽ ഫോണും തട്ടിയെടുത്ത രണ്ടുപേരെ പൊലീസ് അറസ്റ്റ് ചെയ്തു. വഴി ചോദിക്കാനെന്ന വ്യാജേന ഓട്ടോറിക്ഷയിൽ എത്തിയവരാണ് പ്രതികൾ

കൊല്ലം: കടയിൽ പോയി തിരികെ വീട്ടിലേക്ക് മടങ്ങിയ വയോധികനെ റോഡിൽ തടഞ്ഞുനിർത്തി മൊബൈൽ ഫോണും പണവും അപഹരിച്ച പ്രതികൾ പിടിയിൽ. പവിത്രേശ്വരം കാരുവേലിൽ സ്വദേശി 65കാരനായ നടരാജന്‍റെ ഫോണും പണവും അപഹരിച്ച കേസിലാണ് അറസ്റ്റ്. എഴുകോൺ സ്വദേശികളായ പ്രശാന്തൻ, സുദീപൻ എന്നിവരെയാണ് എഴുകോൺ പൊലീസ് പിടികൂടിയത്.

ഇക്കഴിഞ്ഞ 7ന് രാത്രി 7.30 യോടെ എഴുകോൺ കാരുവേലിൽ തുരുത്തേൽ മുക്കിലായിരുന്നു കേസിനാസ്പദമായ സംഭവം. വീടിനു സമീപമുള്ള കടയിൽ പോയി നടരാജൻ തിരികെ വരവെ പ്രതികൾ ഓട്ടോറിക്ഷയിൽ എത്തി നടരാജനോട് വഴി ചോദിച്ചു. വഴി പറഞ്ഞു കൊടുക്കുന്നതിനിടെ പ്രതികൾ പുറത്തിറങ്ങി പോക്കറ്റിൽ ഉണ്ടായിരുന്ന പണവും ഫോണും തട്ടിയെടുത്തു. തടയാൻ ശ്രമിക്കവേ നടരാജനെ റോഡിലേക്ക് തള്ളിയിട്ട ശേഷം ഓട്ടോറിക്ഷയിൽ കടന്നു കളയുകയായിരുന്നു.

നടരാജന്റെ പരാതിയിൽ കേസ് രജിസ്റ്റർ ചെയ്ത എഴുകോൺ പൊലീസ്, സിസിടിവികൾ അടക്കം കേന്ദ്രീകരിച്ച് നടത്തിയ അന്വേഷണത്തിലൂടെയാണ് പ്രതികളെ പിടികൂടിയത്. ഇരുവരെയും കോടതിയിൽ ഹാജരാക്കി റിമാന്റ് ചെയ്തു.