കുറ്റ്യാടി പുഴയിൽ അമ്മയും മകനും ഒഴുക്കിൽപെട്ടു, അമ്മ മരിച്ചു; 7 വയസുകാരനായി തെരച്ചിൽ, തുണിയലക്കാൻ പോയപ്പോൾ അപകടം

എന്നാൽ താലൂക്ക് ആശുപത്രിയിൽ എത്തും മുൻപ് രമ്യയുടെ മരണം സ്ഥിരീകരിച്ചിരുന്നു. ഏഴ് വയസുള്ള മകനായി പുഴയിൽ തെരച്ചിൽ പുരോ​ഗമിക്കുകയാണ്. നാട്ടുകാരും ഫയർഫോഴ്സും ചേർന്നാണ് തെരച്ചിൽ നടത്തുന്നത്.

കോഴിക്കോട്: കുറ്റ്യാടി പുഴയിൽ ഒഴുക്കിൽപെട്ട യുവതി മരിച്ചു. ഫാർമസിസ്റ്റ് ആയ രമ്യ (36) ആണ് മരിച്ചത്. ഒഴുക്കിൽപെട്ട മകൻ ഏഴ് വയസുകാരൻ ശിവനന്ദന് വേണ്ടി തെരച്ചിൽ തുടരുകയാണ്. തോട്ടത്താംകണ്ടി ഭാഗത്താണ് രമ്യയും കുഞ്ഞും ഒഴുക്കിൽപ്പെട്ടത്. മകനൊപ്പം തുണിയലക്കാൻ വേണ്ടി പുഴയിലേക്ക് പോയതാണ് രമ്യ. മകൻ കാൽവഴുതി പുഴയിലേക്ക് വീഴുകയും കു‍ഞ്ഞിനെ രക്ഷിക്കാനുളള ശ്രമത്തിനിടെ ഇരുവരും ഒഴുക്കിൽ പെടുകയായിരുന്നു എന്നാണ് പ്രാദേശികമായി ലഭിക്കുന്ന വിവരം. രമ്യയെ നാട്ടുകാർ ചേർന്ന് രക്ഷിച്ച് കുറ്റ്യാടി ആശുപത്രിയിലേക്ക് എത്തിച്ചിരുന്നു. എന്നാൽ താലൂക്ക് ആശുപത്രിയിൽ എത്തും മുൻപ് രമ്യയുടെ മരണം സ്ഥിരീകരിച്ചിരുന്നു. ഏഴ് വയസുള്ള മകനായി പുഴയിൽ തെരച്ചിൽ പുരോ​ഗമിക്കുകയാണ്. നാട്ടുകാരും ഫയർഫോഴ്സും ചേർന്നാണ് തെരച്ചിൽ നടത്തുന്നത്.