എറണാകുളത്ത് സ്വകാര്യ ബസുകളിലടക്കം മോട്ടോർ വാഹന വകുപ്പിന്റെ മിന്നൽ പരിശോധന; 2.11 ലക്ഷം രൂപ പിഴ ഈടാക്കി

സ്വകാര്യ ബസുകൾ അപകടകരമായ രീതിയിൽ ഓടിക്കുന്നതായും സ്പീഡ് ഗവർണർ അഴിച്ച് മാറ്റി അമിത വേഗത്തിൽ സർവീസ് നടത്തുന്നതായും ലൈസൻസില്ലാതെ വാഹനമോടിക്കുന്നതായും ലഭിച്ച പരാതികളുടെ അടിസ്ഥാനത്തിലായിരുന്നു പരിശോധന.

കൊച്ചി: എറണാകുളം ജില്ലയിൽ സ്വകാര്യ ബസുകൾ ഉൾപ്പെടെയുള്ള വാഹനങ്ങളിൽ മോട്ടോർ വാഹന വകുപ്പ് നടത്തിയ മിന്നൽ പരിശോധനയിൽ വിവിധ ഗതാഗത നിയമ ലംഘനങ്ങൾക്കായി 2,11,500 രൂപ പിഴ ഈടാക്കി. പരിശോധനയിൽ ആകെ 50 നിയമ ലംഘനങ്ങളാണ് കണ്ടെത്തിയത്. സ്വകാര്യ ബസുകൾ അപകടകരമായ രീതിയിൽ ഓടിക്കുന്നതായും സ്പീഡ് ഗവർണർ അഴിച്ച് മാറ്റി അമിത വേഗത്തിൽ സർവീസ് നടത്തുന്നതായും ലൈസൻസില്ലാതെ വാഹനമോടിക്കുന്നതായും ലഭിച്ച പരാതികളുടെ അടിസ്ഥാനത്തിലായിരുന്നു പരിശോധന.

എറണാകുളം എൻഫോഴ്സ്മെന്റ് ആർടിഒ ബിജു ഐസക്കിന്റെ നേതൃത്വത്തിൽ നാല് സ്ക്വാഡുകളായി തിരിഞ്ഞ് തൃപ്പൂണിത്തുറ, ഹൈക്കോടതി പരിസരം, ആലുവ, ഫോർട്ട് കൊച്ചി, മട്ടാഞ്ചേരി തുടങ്ങിയ മേഖലകൾ കേന്ദ്രീകരിച്ചാണ് പരിശോധന നടത്തിയത്. സ്പീഡ് ഗവർണർ അഴിച്ച് മാറ്റിയതായി കണ്ടെത്തിയ നാല് വാഹനങ്ങളുടെ സർവീസ് നിർത്തിവെക്കാൻ നോട്ടീസ് നൽകി.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

അപകടകരമായ ഡ്രൈവിങ്, അമിത വേഗം, ലൈസൻസില്ലാതെ വാഹനമോടിക്കൽ തുടങ്ങിയ ഗുരുതരമായ നിയമലംഘനങ്ങൾക്കെതിരെയാണ് നടപടി സ്വീകരിച്ചത്. റോഡ് സുരക്ഷ ഉറപ്പാക്കുന്നതിനും ഗതാഗത നിയമ ലംഘനങ്ങൾ തടയുന്നതിനുമായി പരിശോധനകൾ കൂടുതൽ ശക്തമാക്കുമെന്ന് മോട്ടോർ വാഹന വകുപ്പ് അറിയിച്ചു.