ദില്ലിയിൽ നിന്ന് 150 എൻഎസ്ജി കമാൻഡോസ് ശബരിമലയിൽ, ഭീകരാക്രമണം നടന്നാൽ രക്ഷാപ്രവര്‍ത്തനം എങ്ങനെ? പൊലീസുമായി ചേര്‍ന്ന് മോക് ഡ്രിൽ

അതീവ സുരക്ഷാ മേഖലയായ ശബരിമല സന്നിധാനത്തും പമ്പയിലും എൻ എസ് ജി, കേരള പോലീസ് കമാൻഡോകൾ, ജില്ലാ പോലീസ് എന്നിവർ സംയുക്തമായി മോക്ക് ഡ്രിൽ നടത്തി. ഭീകരാക്രമണമുണ്ടായാൽ ബന്ദികളെ മോചിപ്പിക്കുകയും ഭീകരരെ കീഴ്പ്പെടുത്തുകയും ചെയ്യുന്നതിനുള്ള പരിശീലനമാണ് നടന്നത്. 

പമ്പ: അതീവ സുരക്ഷാ മേഖലയായ ശബരിമല സന്നിധാനത്തും പമ്പയിലും എൻ എസ് ജി കമാൻഡോകളും, എന്ന പ്രത്യേക കമാൻഡോ വിഭാഗവും കേരള പൊലീസിന്റെ കമാൻഡോ വിഭാഗവും ജില്ലാ പോലീസും സംയുക്തമായി ചേർന്ന് വിജയകരമായി മോക്ക് ഡ്രിൽ നടത്തി. അതീവ സുരക്ഷാമേഖലയിൽ ഒരു ഭീകരാക്രമണം ഉണ്ടായാൽ രക്ഷാപ്രവർത്തനം നടത്തേണ്ടത് എങ്ങനെയെന്ന പരിശീലനമാണ് ഇതുകൊണ്ട് ഉദ്ദേശിക്കുന്നത്.

ഡൽഹിയിൽ നിന്നുള്ള 150 ഓളം എൻ എസ് ജി കമാൻഡോകൾ കേരള പൊലീസിന്റെ കമാൻഡോ വിഭാഗത്തിലെ 30 കമാൻഡോകളും ജില്ലാ പൊലീസിൽ നിന്നുള്ള അൻപതോളം പൊലീസ് ഉദ്യോഗസ്ഥരും മോക്ക് ഡ്രില്ലിൽ പങ്കെടുത്തു. ജില്ലാ പോലീസ് മേധാവി ആര്‍ ആനന്ദ് ഐപിഎസ്, എൻഎസ്ജിയുടെ ഉന്നത ഉദ്യോഗസ്ഥർ എന്നിവർ നേതൃത്വം നൽകി. പത്തനംതിട്ട ജില്ലയിലെ ഡിവൈഎസ്പി മാർ എസ് എച്ച് മാർ എന്നിവരും പങ്കെടുത്തു.

സന്നിധാനത്തും പമ്പയിലും പ്രത്യേകം പ്രത്യേകം പരിശീലനം നടന്നു. ഭീകരാക്രമണത്തിലൂടെ ബന്ദികളാക്കിയ ആൾക്കാരെ കമാൻഡോ ഓപ്പറേഷനിലൂടെ സുരക്ഷിതരായി മോചിപ്പിക്കുകയും ഭീകരരെ കീഴ്പ്പെടുത്തുകയും ചെയ്യുന്നതിനുള്ള പരിശീലനമാണ് നടത്തിയത്. ജില്ലാ ഭരണകൂടം മോക്ക് ഡ്രില്ലിന്റെ ഭാഗമായി വിവിധ സർക്കാര്‍ വകുപ്പുകളുടെ ഏകോപനം നടത്തി.