കുറച്ചുനാളായി പിന്നാലെ ഉണ്ടായിരുന്നു ഫോര്‍ട്ട് പൊലീസും ഡാൻസാഫും; പോക്സോ പ്രതി രഹസ്യവിവരത്തിൽ പിടിവീണത് എംഡിഎംഎയുമായി

തിരുവനന്തപുരത്ത് പോക്സോ കേസിലെ പ്രതിയിൽ നിന്ന് 32 ഗ്രാം എംഡിഎംഎ പിടികൂടി. 

തിരുവനന്തപുരം: എംഡിഎംഎയുമായി പോക്സോ കേസിൽ പ്രതിയായ യുവാവ് പൊലീസ് പിടിയിലായി. മുട്ടത്തറ പൊന്നറ നഗര്‍ സ്വദേശിയായ ഗോകുമാർ (24) ആണ് അറസ്റ്റിലായത്. ബെംഗളൂരുവിൽ നിന്ന് ചില്ലറ വിൽപ്പനയ്ക്കായി എത്തിച്ച 32 ഗ്രാം എംഡിഎംഎ ഇയാളിൽ നിന്ന് പിടികൂടി.

തിരുവനന്തപുരം ഡാൻസാഫ് ടീമിന്റെയും ഫോർട്ട് പൊലീസിന്റെയും സംയുക്ത പരിശോധനയിലാണ് പ്രതി പിടിയിലായത്. ഇയാൾക്ക് എംഡിഎംഎയുടെ ചില്ലറ വിൽപ്പനയുണ്ടെന്ന് രഹസ്യവിവരം ലഭിച്ചതിനെ തുടർന്ന് കുറച്ചുകാലമായി പോലീസ് ഇയാളെ നിരീക്ഷിച്ച് വരികയായിരുന്നു. 2022-ൽ ഫോർട്ട് പോലീസ് സ്റ്റേഷനിൽ രജിസ്റ്റർ ചെയ്ത ഒരു കേസിലും പ്രതിയാണ് ഇയാൾ. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു.