സിസിടിവി കണ്ട് ബൈക്ക് മോഷണ കേസ് പ്രതിയെ തപ്പിയെത്തിയ പൊലീസിന് ഞെട്ടൽ, പ്രതി റഫ്രിജറേറ്റർ സർവ്വീസ് സെന്റർ ഉടമ

കഴിഞ്ഞ 23ന് രാവിലെ കല്ലറ പള്ളിമുക്കിൽ ടൂവീലർ വർക്ക് ഷോപ്പിന് സമീപം വച്ചിരുന്ന ബൈക്ക് മോഷണം പോയിരുന്നു. 

തിരുവനന്തപുരം : മോട്ടോർ സൈക്കിൾ മോഷ്ടിച്ച് പൊളിച്ച് വിൽപ്പന നടത്തുന്ന തമിഴ്നാട് സ്വദേശി അറസ്റ്റിൽ. 
തമിഴ്നാട് - ചെങ്കോട്ട സ്വദേശി മുഹമ്മദ് യൂസഫ് (55) ആണ് പാങ്ങോട് പൊലീസിന്റെ പിടിയിലായത്. കഴിഞ്ഞ 23ന് രാവിലെ കല്ലറ പള്ളിമുക്കിൽ ടൂവീലർ വർക്ക് ഷോപ്പിന് സമീപം വച്ചിരുന്ന ബൈക്ക് മോഷണം പോയിരുന്നു.

പാൽകുളങ്ങര സ്വദേശിയുടെ പരാതിയുടെ അടിസ്ഥാനത്തിൽ പാങ്ങോട് പോലീസ് സിസിടിവി ദൃശ്യം വച്ച് അന്വേഷണം ആരംഭിച്ചു. തുടർന്ന് നടത്തിയ അന്വേഷണത്തിലാണ് മുക്കുന്നുരിൽ 3 മാസമായി റഫ്രിജറേറ്റർ സർവ്വീസ് സെന്റർ നടത്തുന്ന യൂസഫിനെ കണ്ടത്തിയത്. കടയ്ക്ക് അകത്ത് നിന്ന് ബൈക്കും കണ്ടെത്തി. മോഷ്ടിക്കുന്ന ബൈക്ക് തെങ്കാശിയിൽ കൊണ്ട് പോയി പൊളിച്ച് വിൽക്കുന്നതാണ് ഇയാളുടെ രീതി. ഇയാൾക്ക് എതിരെ കൊല്ലം ജില്ലയിലെ വിവിധ സ്റ്റേഷനുകളിൽ കേസുകളുണ്ട്. പ്രതിയെ നെടുമങ്ങാട് കോടതിയിൽ ഹാജരാക്കി റിമാൻഡ് ചെയ്തു.