തിരുവനന്തപുരം സ്വദേശി ഷംനു, മുത്തങ്ങ ചെക്പോസ്റ്റിൽ പെട്ടു; മെത്താഫിറ്റമിനുമായി ലഹരി സംഘത്തിലെ പ്രധാനി പിടിയിൽ

കർണാടകയിൽ നിന്നും കേരളത്തിലേക്ക് ലഹരി എത്തിക്കുന്ന ശൃംഖലയിലെ പ്രധാന കണ്ണിയാണ് ഷംനുവെന്ന് എക്സൈസ് അറിയിച്ചു.

സുൽത്താൻബത്തേരി: വയനാട്ടിൽ മുത്തങ്ങ എക്സൈസ് ചെക്ക് പോസ്റ്റിൽ മാരക മയക്കുമരുന്നായ മെത്താഫിറ്റമിനുമായി തിരുവനന്തപുരം സ്വദേശി അറസ്റ്റിൽ. മലയിൻകീഴ് തോട്ടുപുറത്ത് പുത്തൻ വീട്ടിൽ എൽ.എസ് ഷംനു (29) ആണ് അറസ്റ്റിൽ ആയത്. അതിർത്തി ചെക്ക് പോസ്റ്റിലെ വാഹന പരിശോധനയ്ക്കിടെയാണ് ഇയാളെ പിടികൂടിയത്. കോഴിക്കോട്ടേക്ക് വരികയായിരുന്ന കേരള ആർടിസി ബസ്സിലെ യാത്രക്കാരനായിരുന്നു ഷംനു. 

ചെക്ക് പോസ്റ്റിലെ പരിശോധനയിലാണ് യുവാവിൽ നിന്നും 306 ഗ്രാം മെത്താഫിറ്റമിൻ കണ്ടെടുത്തത്. കർണാടകയിൽ നിന്നും കേരളത്തിലേക്ക് ലഹരി എത്തിക്കുന്ന ശൃംഖലയിലെ പ്രധാന കണ്ണിയാണ് ഷംനുവെന്ന് എക്സൈസ് അറിയിച്ചു. എക്സൈസ് ഇൻസ്പെക്ടർ എൻ. സന്തോഷ്, പ്രിവന്റീവ്  ഓഫീസർമാരായ എ.എസ് അനീഷ്,  പി.ആർ വിനോദ്, വനിത സിവിൽ എക്സൈസ് ഓഫീസർമാരായ ബി. ആർ. രമ്യ, എ. അഞ്ജുലക്ഷ്മി, സിവിൽ എക്സൈസ് ഓഫീസർമാരായ വി.കെ. വൈശാഖ്, എം.എം. ബിനു എന്നിവരടങ്ങിയ സംഘമാണ് പരിശോധന പരിശോധന നടത്തിയത്.