നേരം പുലരും മുന്നേ ബൈക്കിൽ ചുരം കയറിയെത്തി, പൊലീസിനെ കണ്ടതോടെ വെപ്രാളം; ചോദ്യം ചെയ്യലിൽ കള്ളി വെളിച്ചത്ത്
Synopsis
കോഴിക്കോട് താമരശ്ശേരി ചുരത്തിൽ പോലീസ് നടത്തിയ വാഹന പരിശോധനയിൽ മോഷ്ടിച്ച ബൈക്കുകളുമായി മൂന്ന് യുവാക്കളെ അറസ്റ്റ് ചെയ്തു.
കോഴിക്കോട്: താമരശ്ശേരി ചുരത്തില് പൊലീസ് നടത്തിയ വാഹന പരിശോധനയില് മോഷ്ടിച്ച ബൈക്കുകളുമായി മൂന്ന് യുവാക്കള് പിടിയില്. വയനാട് കല്പറ്റ പിണങ്ങോട് സ്വദേശികളായ അമൃത നിവാസില് അഭിഷേക്, പറപ്പാടന് അജ്നാസ്, ചുണ്ടയില് സ്വദേശി മോതിരോട്ട് ഫസല് എന്നിവരെയാണ് താമരശ്ശേരി പൊലീസ് അറസ്റ്റ് ചെയ്തത്. ഇവര് സഞ്ചരിച്ചിരുന്ന രണ്ട് ബൈക്കുകള് മോഷ്ടിച്ചതാണെന്ന് പൊലീസ് കണ്ടെത്തുകയായിരുന്നു.
ഇന്ന് പുലര്ച്ചെയാണ് മൂന്ന് പേരും പിടിയിലായത്. രണ്ട് ബൈക്കുകളിലായാണ് മൂന്ന് പേരും സഞ്ചരിച്ചിരുന്നത്. കെഎല് 60 ഡി 5143 നമ്പറിലുള്ള ബൈക്കില് ഫസലും കെഎല് 11 എല് 6569 നമ്പര് ബൈക്കില് അഭിഷേകും അജ്നാസുമാണ് യാത്ര ചെയ്തത്. ഇവരുടെ പെരുമാറ്റത്തില് സംശയം തോന്നിയ ഉദ്യോഗസ്ഥര് കൂടുതല് ചോദ്യം ചെയ്തപ്പോള് മോഷണം പുറത്താവുകയായിരുന്നു. മോഷണവുമായി ബന്ധപ്പെട്ട രണ്ട് കേസുകള് ഇവര്ക്കെതിരേ രജിസ്റ്റര് ചെയ്തിട്ടുണ്ട്. പ്രതികള് കൂടുതല് മോഷണങ്ങള് നടത്തിയിട്ടുണ്ടോ എന്നറിയാന് ചോദ്യം ചെയ്തുവരികയാണെന്ന് പോലീസ് പറഞ്ഞു.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം