നിയന്ത്രണം വിട്ട ബൈക്കില്‍നിന്ന് സുഹൃത്ത് ഓടിച്ച ലോറിക്കടിയിലേക്ക് വീണു, ടിപ്പര്‍ ഡ്രൈവര്‍ക്ക് ദാരുണാന്ത്യം

തിരുവനന്തപുരത്ത് സുഹൃത്ത് ഓടിച്ചിരുന്ന ടിപ്പര്‍ ലോറിക്കടിയിലേക്ക് തെറിച്ച് വീണ് ടിപ്പര്‍ ഡ്രൈവര്‍ മരിച്ചു. കല്ലറ സ്വദേശി അരുണ്‍ കുമാറാണ് മരിച്ചത്. 31 വയസ്സായിരുന്നു. തിങ്കളാഴ്ച രാവിലെ ആറിനാണ് സംഭവം.

തിരുവനന്തപുരം: നിയന്ത്രണം വിട്ട ബൈക്കില്‍നിന്ന് സുഹൃത്ത് ഓടിച്ചിരുന്ന ടിപ്പര്‍ ലോറിക്കടിയിലേക്ക് തെറിച്ച് വീണ് ടിപ്പര്‍ ഡ്രൈവര്‍ക്ക് ദാരുണാന്ത്യം. കല്ലറ മരുതമണ്‍ കാവ്‌വിള വീട്ടില്‍ അനില്‍ കുമാറിന്റെയും ലളിതയുടെയും മകനും ടിപ്പര്‍ ഡ്രൈവറുമായ അരുണ്‍ കുമാറാണ് (31) മരിച്ചത്.

തിങ്കളാഴ്ച രാവിലെ ആറിന് വെഞ്ഞാറമൂട് പുത്തന്‍പാലം റോഡില്‍ ചുളളാളം ജുമാ മസ്ജിദിന് സമീപം വെച്ചായിരുന്നു അപകടം. പുല്ലമ്പാറയിലുള്ള ക്വാറിയിൽ ലോഡ് കയറ്റാന്‍ കൊണ്ടിട്ടിരുന്ന ലോറി എടുക്കാന്‍ വീട്ടിൽനിന്ന് വരുന്നതിനിടെ നിയന്ത്രണം വിട്ട ബൈക്കില്‍നിന്നു തെറിച്ച് ഇതേ ക്വാറിയില്‍നിന്ന് ലോഡും കയറ്റി വന്ന ടിപ്പര്‍ ലോറിക്കടിയിലേക്ക് വീണായിരുന്നു അപകടം.

തലയിലൂടെ ടയര്‍ കയറിയിറങ്ങി അരുണ്‍ കുമാര്‍ സംഭവ സ്ഥലത്ത് വച്ച് തന്നെ മരണമടയുകയായിരുന്നു. തുടര്‍ന്ന് വെഞ്ഞാറമൂട് പൊലീസ് ഇന്‍ക്വസ്റ്റ് ചെയ്ത മൃതദേഹം പോസ്റ്റ് മാർട്ടത്തിന് ശേഷം ബന്ധുക്കള്‍ക്ക് വിട്ടുനൽകി.