ആലപ്പുഴയിൽ ഡോമിനോർ ബൈക്കിൽ സഞ്ചരിച്ച യുവാക്കൾ പിടിയിൽ, ബൈക്കും കസ്റ്റഡിയിൽ; എക്സൈസ് സംഘം കണ്ടെത്തിയത് 1.25 കിലോ കഞ്ചാവ്

ആലപ്പുഴയിൽ എക്സൈസ് നടത്തിയ മിന്നൽ പരിശോധനയിൽ 1.25 കിലോ കഞ്ചാവ് പിടികൂടി. മണ്ണഞ്ചേരി സ്വദേശികളായ രണ്ട് യുവാക്കൾ പിടിയിലായി. കഞ്ചാവ് കടത്താനുപയോഗിച്ച ബൈക്ക് കസ്റ്റഡിയിലെടുത്ത സംഘം, പ്രതികളിലൊരാൾ മുൻപും മയക്കുമരുന്ന് കേസുകളിൽ ഉൾപ്പെട്ടിട്ടുണ്ടെന്ന് അറിയിച്ചു.

ആലപ്പുഴ: രഹസ്യ വിവരത്തെ തുടർന്ന് എക്സൈസ് സംഘം നടത്തിയ മിന്നൽ പരിശോധനയിൽ കഞ്ചാവുമായി രണ്ട് യുവാക്കൾ പിടിയിലായി. അമ്പലപ്പുഴ താലൂക്കിലെ മണ്ണഞ്ചേരി സ്വദേശികളായ ശ്രീഹരി (24), ഷാരോൺ (23) എന്നിവരാണ് എക്സൈസ് എൻഫോഴ്സ്‌മെന്റ് ആൻഡ് ആന്റി നർക്കോട്ടിക് സ്പെഷ്യൽ സ്ക്വാഡിന്റെ വലയിലായത്. പ്രതികളിൽ നിന്ന് 1.25 കിലോ കഞ്ചാവ് കണ്ടെത്തി. ഇവർ കഞ്ചാവ് കടത്താൻ ഉപയോഗിച്ച KL 82 A 6993 എന്ന നമ്പറിലുള്ള ഡൊമിനർ ബൈക്കും ഉദ്യോഗസ്ഥർ കസ്റ്റഡിയിലെടുത്തു. 

പിടിയിലായ ശ്രീഹരി മുൻപും നിരവധി മയക്കുമരുന്ന് കേസുകളിൽ പ്രതിയാണെന്ന് എക്സൈസ് ഉദ്യോഗസ്ഥർ പറഞ്ഞു. ആലപ്പുഴ എക്സൈസ് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ എ സെബാസ്റ്റ്യന്റെ നേതൃത്വത്തിലാണ് പരിശോധന നടന്നത്. ഇൻസ്പെക്ടർ സി പി ദിലീപ്, അസിസ്റ്റന്റ് ഇൻസ്പെക്ടർമാരായ ബിനു എം സി, കെ ആർ രാജീവ് എന്നിവരടങ്ങുന്ന സംഘമാണ് പ്രതികളെ പിടികൂടിയത്. ഇവരെ അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കും. പ്രതികളുടെ കഞ്ചാവ് ബന്ധമടക്കം തുടരന്വേഷണം നടത്തുമെന്ന് ഉദ്യോഗസ്ഥർ വ്യക്തമാക്കി.