തിരുവനന്തപുരം സിഇടിയിൽ അപകടം; കെട്ടിടത്തിന് മുകളിൽ നിന്ന് വീണ് 2 വിദ്യാർത്ഥികൾക്ക് പരിക്ക്

ഇരുവരെയും ഉടൻ തന്നെ മെഡിക്കൽ കോളേജിലെത്തിച്ചു. ഇരുവരുടെയും പരിക്ക് ഗുരുതരമല്ലെന്നാണ് പ്രാഥമിക വിവരം

തിരുവനന്തപുരം: കോളേജ് ഓഫ് എഞ്ചിനീയറിങ് ആന്റ് ടെക്നോളയിലെ കെട്ടിടത്തിന് മുകളിൽ നിന്ന് വീണ് രണ്ട് വിദ്യാർത്ഥികൾക്ക് പരിക്കേറ്റു. ഇരുവരെയും തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. ഇന്ന് രാത്രി ഏഴുമണിയോടെയാണ് സംഭവം. ഇലക്ട്രോണിക്സ് ഡിപ്പാർട്ടുമെന്റിന്റെ നിർമ്മാണത്തിലിരുന്ന കെട്ടിടത്തിനുള്ളിലാണ് സംഭവം. എം ബി എ വിദ്യാർത്ഥികളായ അപർണ്ണ (22) സുദേവ് (22) എന്നിവർക്കാണ് പരിക്കേറ്റത്. ലിഫ്റ്റിനായുള്ള ഭാഗത്ത് കൂടി താഴെ വീണതെന്നാണ് പ്രാഥമിക നിഗമനം. എന്തോ വീഴുന്ന ശബ്ദവും നിലവിളിയും കേട്ട മറ്റു വിദ്യാർത്ഥികളാണ് ഇവരെ കണ്ടെത്തിയത്. ഇരുവരെയും ഉടൻ തന്നെ മെഡിക്കൽ കോളേജിലെത്തിച്ചു. ഇരുവരുടെയും പരിക്ക് ഗുരുതരമല്ലെന്നാണ് പ്രാഥമിക വിവരം.