പഞ്ചായത്ത് ഓഫീസിന് മുന്നിലും വെള്ളനാട് ജങ്ഷനിലും സ്ഥാപിച്ച ബോർഡുകളിൽ നിന്നാണ് ചിത്രം വെട്ടിയെടുത്തത്...
തിരുവനന്തപുരം: തന്നോട് സമ്മതം ചോദിക്കാതെ ഫ്ലക്സ് ബോർഡിൽ നൽകിയ സ്വന്തം ചിത്രം വെട്ടിയെടുത്ത് ജില്ലാ പഞ്ചായത്തംഗം വെള്ളനാട് ശശി(Vellanad Shashi) . പഞ്ചായത്ത് ഭരണ സമിതിയുടെ ഒന്നാം വാർഷികവുമായി ബന്ധപ്പെട്ട് സ്ഥാപിച്ചിരുന്ന ഫ്ലക്സ് ബോർഡിൽ (Flex Board) നിന്നാണ് ശശി സ്വന്തം ചിത്രം വെട്ടിയെടുത്തത്. തന്റെ അനുവാദം ഇല്ലാതെ പരിപാടിയുടെ നോട്ടിസിൽ പേര് വച്ചതും ഫ്ലക്സ് ബോർഡിൽ ചിത്രം നൽകിയതും ശശിയെ പ്രകോപിതനാക്കിയിരുന്നു. പഞ്ചായത്ത് ഓഫീസിന് മുന്നിലും വെള്ളനാട് ജങ്ഷനിലും സ്ഥാപിച്ച ബോർഡുകളിൽ നിന്നാണ് ചിത്രം വെട്ടിയെടുത്തത്. ഇന്നലെയായിരുന്നു സംഭവം.
നേരത്തെ കിടങ്ങുമ്മൽ സബ് സെന്ററിന്റെ ഉദ്ഘാടനം ആദ്യം നടത്തിയെന്ന് കാണിച്ച് ശശി സ്ഥാപിച്ച ശിലാഫലകം പഞ്ചായത്ത് മാറ്റി സ്ഥാപിച്ചിരുന്നു. ഇതിന് പിന്നാലെ ഇവിടെയെത്തി ശശി ശിലാഫലകം തകർത്തു. ഇത് കേസായതോടെ ശശി അറസ്റ്റിലാവുകയും അദ്ദേഹത്തെ റിമാന്റ് ചെയ്യുകയും ചെയ്തിരുന്നു. ശശിയുടെ പാർട്ടിയായ കോൺഗ്രസ് ഭരിക്കുന്ന പഞ്ചായത്തിൽ പാർട്ടിയുടെയും പഞ്ചായത്ത് കമ്മിറ്റിയുടെയും അനുവദാത്തേടെയാണ് പരിപാടി സംഘടിപ്പിച്ചതെന്നാണ് പഞ്ചായത്ത് വൈസ് പ്രസിഡന്റ് ശ്രീകണ്ഠൻ പറയുന്നത്.