രാത്രിയില്‍ സംഭവിച്ചതിനാല്‍ ആരുടെയും ശ്രദ്ധയില്‍പ്പെട്ടില്ല, ബൈക്ക് താഴ്ചയിലേക്ക് മറിഞ്ഞ് ഗുരുതരമായി പരിക്കേറ്റ യുവാവിന് ദാരുണാന്ത്യം

കോഴിക്കോട് കായണ്ണ സ്വദേശി സിദ്ധാര്‍ഥ് ബൈക്ക് അപകടത്തില്‍ മരിച്ചു. ബാലുശ്ശേരി-കൂരാച്ചുണ്ട് റോഡില്‍ നിയന്ത്രണംവിട്ട ബൈക്ക് താഴ്ചയിലേക്ക് മറിഞ്ഞാണ് അപകടമുണ്ടായത്. രാത്രിയില്‍ നടന്ന അപകടം ആളൊഴിഞ്ഞ സ്ഥലമായതിനാല്‍ രാവിലെയാണ് പുറംലോകമറിഞ്ഞത്.

കോഴിക്കോട്: ബൈക്ക് നിയന്ത്രണംവിട്ടതിനെ തുടര്‍ന്ന് താഴ്ചയിലേക്ക് മറിഞ്ഞുണ്ടായ അപകടത്തില്‍ യുവാവിന് ദാരുണാന്ത്യം. കോഴിക്കോട് കായണ്ണ, നരിനട സ്വദേശി സിദ്ധാര്‍ഥാണ് മരിച്ചത്. ബാലുശ്ശേരി-കൂരാച്ചുണ്ട് റോഡില്‍ കൂട്ടാലിടയ്ക്ക് സമീപത്ത് വെച്ചാണ് അപകടം നടന്നത്.

സിദ്ധാര്‍ത്ഥ് സഞ്ചരിച്ച ബൈക്ക് നിയന്ത്രണംവിട്ട് താഴ്ചയിലേക്ക് പതിക്കുകയായിരുന്നു എന്നാണ് ലഭിക്കുന്ന വിവരം. ഉച്ചയോടെ സമീപത്തെ വീട്ടുകാരാണ് അപകടത്തില്‍പ്പെട്ട വാഹനം കണ്ടത്. പിന്നീട് ഇതിന് സമീപത്തായി സിദ്ധാര്‍ത്ഥിനെ മരിച്ച നിലയില്‍ കണ്ടെത്തുകയായിരുന്നു. കഴിഞ്ഞ ദിവസം രാത്രിയിലാണ് അപകടം നടന്നതെന്നാണ് കരുതുന്നത്. ആളൊഴിഞ്ഞ ഭാഗമായതിനാല്‍ അപകടം ആരുടെയും ശ്രദ്ധയില്‍പ്പെട്ടില്ല. കൂരാച്ചുണ്ട് പോലീസ് സ്ഥലത്തെത്തി ഇന്‍ക്വസ്റ്റ് നടപടികള്‍ പൂര്‍ത്തീകരിച്ചു.