സ്വര്‍ണവില കുത്തനെ ഇടിഞ്ഞു

കൊച്ചി: അമേരിക്കന്‍ പ്രസിഡന്റ് തെരഞ്ഞെടുപ്പില്‍ ഡോണാള്‍ഡ് ട്രംപ് വിജയിച്ചതിനെത്തുടര്‍ന്ന് ആഗോള ഓഹരി വിപണികളിലുണ്ടായ തകര്‍ച്ചയ്ക്ക് പിന്നാലെ കുത്തനെ ഉയര്‍ന്ന സ്വര്‍ണവില വ്യാഴാഴ്ച കുത്തനെ ഇടിഞ്ഞു. ആഭ്യന്തര വിപണിയില്‍ ബുധനാഴ്ച 600 രൂപ ഉയർന്ന സ്വർണ വില ഇന്ന് 600 കുറഞ്ഞു.

22,880 രൂപയാണ് ഇന്ന് പവന്റെ വില. ഗ്രാമിന് 75 രൂപ കുറഞ്ഞ് 2,860 രൂപയിലാണ് വ്യാപാരം പുരോഗമിക്കുന്നത്. 1,000, 500 രൂപ നോട്ടുകൾ പിൻവലിച്ചതോടെ ആഭ്യന്തര സ്വർണ വിപണിയിൽ വ്യാപാരം കുറഞ്ഞിരുന്നു.

ആഗോള ഓഹരി വിപണികള്‍ കൂപ്പുകുത്തിയതോടെ സുരക്ഷിത നിക്ഷേപമെന്ന നിലയില്‍ നിക്ഷേപകര്‍ സ്വര്‍ണത്തിലേക്ക് തിരിഞ്ഞതാണ് രാജ്യാന്തര വിപണിയിലും ആഭ്യന്തര വിപണിയിലും കഴിഞ്ഞ ദിവസം സ്വർണ വിലയില്‍ പ്രതിഫലിച്ചത്.