താരിഫിൽ അമേരിക്ക അയയുമോ? ട്രംപ് നൽകിയ പ്രതീക്ഷയിൽ കുതിച്ച് ഇന്ത്യൻ ഓഹരി വിപണി

അമേരിക്കയുമായുള്ള വ്യാപാര ചര്‍ച്ചകളില്‍ പുരോഗതിയുണ്ടാകുമെന്ന പ്രതീക്ഷയാണ് മുന്നേറ്റത്തിന് പ്രധാന കാരണം

ദില്ലി: ഇന്ത്യൻ ഓഹരികൾ ഇന്ന് ഉയർന്ന നിലയിൽ വ്യാപാരം നടത്തി. ജിഎസ്ടി കുറയ്ക്കുന്നതും അമേരിക്കയും ഇന്ത്യയും തമ്മിലുള്ള പുതുക്കിയ വ്യാപാര ചർച്ചകളും നിക്ഷേപകർക്ക് പ്രതീക്ഷ നൽകിയെന്നുവേണം കരുതാൻ. നിഫ്റ്റി തുടർച്ചയായ അഞ്ചാം ദിവസവും നേട്ടം കൈവരിച്ചു. സെന‍്സെക്സ് 450 പോയിന്‍റിലധികം നേട്ടത്തോടെ കുതിച്ചുയർന്നു. ഇതോടെ സൂചിക 81,500 ത്തിന് മുകളിലാണ്.

പതിനാറ് പ്രധാന മേഖലകളിൽ പതിനഞ്ചിലും മികച്ച രീതിയിൽ വ്യാപാരം മുന്നേറുന്നു, ഐടി ഓഹരികളാണ് ഇതിന് നേതൃത്വം നൽകുന്നത്. എന്നാൽ ഓട്ടോ ഓഹരികൾ സമ്മർദ്ദത്തിലാണ് വ്യാപാരം നടത്തുന്നത്. 415 കോടി രൂപയുടെ രാജസ്ഥാൻ സോളാർ പ്രോജക്റ്റ് ഓർഡറിന് ശേഷം സ്റ്റെർലിംഗ് ആൻഡ് വിൽസൺ ഓഹരികൾ 5% ഉയർന്നു, വിക്രം സോളാർ ഓഹരികൾ 13% ഉയർന്നു

ഇന്ത്യയും യുഎസും തമ്മിലുള്ള ബന്ധം വീണ്ടും മെച്ചപ്പടുത്താനാകുമെന്നുള്ള ട്രംപിന്റെ നിലപാടോടു കൂടിയാണ് ഓഹരി വിപണി ഉണർന്നത്. ഇരു രാജ്യങ്ങളും തമ്മിലുള്ള വ്യാപാര ചർച്ചകൾ പുരോഗമിക്കുകയാണ്. ഐടി ഓഹരികൾ ഇപ്പോഴും മുന്നേറിക്കൊണ്ടിരിക്കുകയാണ്, വിപ്രോ, ടിസിഎസ്, ടെക് മഹീന്ദ്ര, എച്ച്സിഎൽടെക് എന്നിവയാണ് പ്രധാന നേട്ടങ്ങൾ കൈവരിക്കുന്നത്. നിഫ്റ്റി 500 ഓഹരികളിൽ ഏറ്റവും വലിയ നേട്ടമുണ്ടാക്കിയ ചിലത് വെൽസ്പൺ, ഐജിഐഎൽ, ഒറാക്കിൾ ഫിൻ, ഹിമാദ്രി, വർധമാൻ ടെക്സ്റ്റൈൽ, ടാൻല പ്ലാറ്റ്‌ഫോമുകൾ എന്നിവയും മറ്റുള്ളവയും വലിയ നേട്ടത്തോടെ വ്യാപാരം നടത്തുന്നു.

അതേസമയം രൂപയുടെ മൂല്യം ഇടിഞ്ഞിട്ടുണ്ട്. ഇന്നലെ ഒരു ഡോളറിന് 87 രുപ 98 പൈസ എന്ന നിലയില്‍ വിനിമയം നടന്നെങ്കിലും ഇന്ന് വ്യാപാരം ആരംഭിക്കുമ്പോൾ രൂപയുടെ മൂല്യം 88.14 എന്ന നിലയിലെത്തിയിട്ടുണ്ട്.