ബജറ്റ് 2019: ​ദേശീയ ​ഗോ സുരക്ഷാ കമ്മീഷനെ സ്വാ​ഗതം ചെയ്യുന്നതായി ആർഎസ്എസ്

നാടൻ പശുക്കളെയാണോ ഉദ്ദേശിച്ചതെന്ന കാര്യത്തിൽ വ്യക്തതയുണ്ടാകണം. ദേശീയ കമ്മീഷനെക്കുറിച്ച് കൂടുതൽ കാര്യങ്ങൾ പുറത്ത് വന്നിട്ടില്ലെങ്കിലും പശുക്കളുടെ പ്രാധാന്യത്തെയും സുരക്ഷയെയും  ലക്ഷ്യമാക്കി ഒരു ഏജൻസി ഉണ്ടാകേണ്ടത് അത്യാവശ്യമാണ്.

ദില്ലി: ദേശീയ ​ഗോ സുരക്ഷാ കമ്മീഷനെ സ്വാ​ഗതം ചെയ്ത് ആർഎസ്എസ് ​ഗോ സേവാ പ്രമുഖ് അജിത് മഹാപത്ര. ​കൂടുതൽ ജനിതക ​ഗുണമുള്ള കന്നുകാലി ഇനങ്ങളെ ഉത്പാദിപ്പിക്കാനായി രൂപീകരിച്ച രാഷ്ട്രീയ കാമധേനു ആയോ​ഗ്  മികച്ച പദ്ധതിയാണെന്നും കർഷക ആത്മഹത്യകളെ ഇല്ലായ്മ ചെയ്യുന്ന ബജറ്റാണ് ഇത്തവണ  സർക്കാർ കൊണ്ടുവന്നിരിക്കുന്നതെന്നും മഹാപത്ര പറ‍‍ഞ്ഞു. 

പശുവിനായി ദേശീയ കമ്മീഷനെ നിയോ​ഗിച്ച നടപടിയെ സ്വാ​ഗതം ചെയ്യുന്നു. എന്നാൽ നാടൻ പശുക്കളെയാണോ ഉദ്ദേശിച്ചതെന്ന കാര്യത്തിൽ വ്യക്തതയുണ്ടാകണം. ദേശീയ കമ്മീഷനെക്കുറിച്ച് കൂടുതൽ കാര്യങ്ങൾ പുറത്ത് വന്നിട്ടില്ലെങ്കിലും പശുക്കളുടെ പ്രാധാന്യത്തെയും സുരക്ഷയെയും  ലക്ഷ്യമാക്കി ഒരു ഏജൻസി ഉണ്ടാകേണ്ടത് അത്യാവശ്യമാണ്. മഹാപത്ര വ്യക്തമാക്കി. ​​ഗ്രാമങ്ങളുടെ വികസനത്തിലും കൃഷിയിലും പശുക്കൾക്ക് പ്രാധാന്യമുണ്ട്. പാൽ, നെയ്യ്, വെണ്ണ, ചാണകം, മൂത്രം എന്നിവ നൽകുന്നു. കർഷകർക്ക് ഏറെ ഉപകാരപ്രദമായ ഉത്പന്നങ്ങളാണിവ എന്നും മഹാപത്ര വിശദീകരിച്ചു.

മോഹൻ ഭ​ഗവത്, ആർ എസ് സുദർശൻ എന്നീ നേതാക്കൾ പശുസംരക്ഷണത്തിനായി അഭിപ്രായങ്ങൾ പറ‍ഞ്ഞിട്ടുണ്ട്. അതുപോലെ പശുസംരക്ഷണത്തെക്കുറിച്ച് കർഷകർക്ക് ബോധവത്കരണം നടത്തേണ്ടതും അത്യാവശ്യമാണ്. ​ഒരു ​ഗ്രാമത്തിലെ അഞ്ച് ശതമാനം ആളുകളെങ്കിലും വീടുകളിൽ പശുക്കളെ വളർത്തണം. ഈ വർഷം ആർഎസ് എസിന്റെ ​ഗോസേവാ സെൽ‌ ചാണകത്തിന്റെയും പശുമൂത്രത്തിന്റെയും ​ഗുണങ്ങളെക്കുറിച്ച് ജനങ്ങളിൽ അവബോധം സൃഷ്ടിക്കുന്നതിനായി ക്ഷേത്രങ്ങളും മഠങ്ങളും സന്ദർശിച്ചിരുന്നു. ​ഗോ ജപ മഹായാ​ഗവും നടത്തിയിരുന്നതായി അജിത് മഹാപത്ര വ്യക്തമാക്കി.