ഹോട്ടല് ഭക്ഷണം ശീലമാണോ? നിങ്ങളുടെ കീശ ചോരുന്നത് അറിയുന്നുണ്ടോ? ഈ 'ചെറിയ വലിയ' കാര്യത്തിൽ ശ്രദ്ധ വേണം
Synopsis
പുറത്തുനിന്നു ഭക്ഷണം കഴിക്കുന്നത് വീട്ടിലുണ്ടാക്കുന്നതിനേക്കാള് ചിലവേറിയതാണ്. ഡെലിവറി ചാര്ജ് പോലുള്ള അധിക ചെലവുകള് ഇതിന് കാരണമാണ്. ഈ ശീലം ദീര്ഘകാലാടിസ്ഥാനത്തില് നിങ്ങളുടെ സാമ്പത്തിക ഭദ്രതയെ കാര്യമായി ബാധിക്കുകയും സമ്പാദ്യത്തെ ഇല്ലാതാക്കുകയും ചെയ്യും. വീട്ടില് ഭക്ഷണം പാകം ചെയ്യുന്നത് സാമ്പത്തിക അച്ചടക്കം വളര്ത്താനും പണം ലാഭിക്കാനും സഹായിക്കും
തിരക്കുപിടിച്ച ജീവിതശൈലിയില് ഇന്ന് പുറത്തുനിന്നു ഭക്ഷണം കഴിക്കുന്നതും ഓണ്ലൈനായി ഓര്ഡര് ചെയ്യുന്നതും നമ്മുടെ ദൈനംദിന ജീവിതത്തിന്റെ ഭാഗമായി മാറിക്കഴിഞ്ഞു. ഓഫീസിലെ തിരക്ക്, സുഹൃത്തുക്കളുമായുള്ള ഒത്തുചേരലുകള്, മൊബൈല് ആപ്പുകള് എന്നിവയെല്ലാം ഇതിന് കാരണമാണ്. എന്നാല്, വല്ലപ്പോഴും ചെയ്യുന്ന ഈ വിനോദം ദീര്ഘകാലാടിസ്ഥാനത്തില് നിങ്ങളുടെ സാമ്പത്തിക ഭദ്രതയെ എങ്ങനെ ബാധിക്കുമെന്ന് ചിന്തിച്ചിട്ടുണ്ടോ?
വിലയിലെ വന് വ്യത്യാസം
വീട്ടിലുണ്ടാക്കുന്ന ഒരു പ്ലേറ്റ് ഭക്ഷണവും ഹോട്ടലില് നിന്ന് വാങ്ങുന്ന അതേ ഭക്ഷണവും തമ്മില് വിലയില് വലിയ അന്തരമുണ്ട്. പാചകവാതകം, പലവ്യഞ്ജനങ്ങള്, പച്ചക്കറികള് എന്നിവയുടെ വില കൂട്ടിയാല് പോലും വീട്ടിലുണ്ടാക്കുന്ന ഭക്ഷണത്തിന് ഹോട്ടല് ഭക്ഷണത്തിന്റെ പകുതി വില പോലും വരില്ല എന്നതാണ് യാഥാര്ത്ഥ്യം.
മറഞ്ഞിരിക്കുന്ന അധിക ചിലവുകള്
ഹോട്ടല് ഭക്ഷണത്തിന്റെ ബില്ല് പരിശോധിച്ചാല് ഭക്ഷണത്തിന്റെ യഥാര്ത്ഥ വിലയേക്കാള് കൂടുതല് പലപ്പോഴും മറ്റ് ചാര്ജുകളായിരിക്കും. ഡെലിവറി ചാര്ജ്, പ്ലാറ്റ്ഫോം ഫീ, ജിഎസ്ടി , വെയിറ്റര്മാര്ക്കുള്ള ടിപ്പ് എന്നിവയെല്ലാം ഇതില്പ്പെടും. ഓരോ തവണയും ചെറിയ തുകകളായി തോന്നുമെങ്കിലും, മാസം അവസാനം കണക്കെടുക്കുമ്പോള് ഇത് വലിയൊരു തുകയായി മാറിയിട്ടുണ്ടാകും.
ചെറിയ ശീലങ്ങള്, വലിയ നഷ്ടങ്ങള്
വല്ലപ്പോഴും ഹോട്ടലില് പോകുന്നത് മാത്രമല്ല സാമ്പത്തിക പ്രശ്നമുണ്ടാക്കുന്നത്. ദിവസവുമുള്ള ചായകുടി, ഓഫീസിലിരുന്ന് ഓര്ഡര് ചെയ്യുന്ന ഉച്ചഭക്ഷണം, ലഘുഭക്ഷണങ്ങള് എന്നിവയാണ് വില്ലന്മാര്. സൗകര്യത്തിന് വേണ്ടി നമ്മള് നല്കുന്ന ഈ ചെറിയ തുകകള് ദീര്ഘകാലാടിസ്ഥാനത്തില് സമ്പാദ്യത്തെ സാരമായി ബാധിക്കും.
വീട്ടുഭക്ഷണം നല്കുന്ന സാമ്പത്തിക അച്ചടക്കം
ഭക്ഷണം വീട്ടില് തന്നെ തയ്യാറാക്കുന്നത് വഴി കൃത്യമായ ബജറ്റ് പ്ലാന് ചെയ്യാന് നമുക്ക് സാധിക്കും. അനാവശ്യമായ ആഹാരസാധനങ്ങള് വാങ്ങി പണം കളയുന്നത് ഒഴിവാക്കാനും ഇത് സഹായിക്കും. ഓരോ മാസവും ഭക്ഷണത്തിനായി എത്ര രൂപ ചിലവാകുന്നു എന്നതിനെക്കുറിച്ച് വീട്ടില് പാചകം ചെയ്യുന്നവര്ക്ക് കൃത്യമായ ധാരണയുണ്ടാകും.
സമ്പാദ്യം വളര്ത്താം
ഭക്ഷണ കാര്യത്തില് വരുത്തുന്ന ചെറിയ നിയന്ത്രണങ്ങള് വഴി ലാഭിക്കുന്ന പണം വലിയ ആവശ്യങ്ങള്ക്കായി ഉപയോഗിക്കാം. ബാങ്ക് നിക്ഷേപങ്ങള്ക്കോ, വീടിന്റെ ലോണ് തിരിച്ചടവിനോ, മറ്റ് നിക്ഷേപങ്ങള്ക്കോ ഈ തുക പ്രയോജനപ്പെടും. ആഴ്ചയില് ചില ദിവസങ്ങളില് മാത്രം വീട്ടില് പാചകം ചെയ്യാന് തീരുമാനിച്ചാല് പോലും വര്ഷാവസാനം വലിയൊരു തുക ലാഭിക്കാന് സാധിക്കും.
മിതത്വമാണ് പ്രധാനം
പുറത്തുനിന്നുള്ള ഭക്ഷണം പൂര്ണ്ണമായും ഒഴിവാക്കണമെന്നല്ല ഇതിനര്ത്ഥം. ഹോട്ടലില് പോകുന്നതും ഭക്ഷണം ആസ്വദിക്കുന്നതും ഒരു സന്തോഷമാണ്. എന്നാല് അത് എത്രത്തോളം വേണം എന്നതിനെക്കുറിച്ച് നമുക്ക് കൃത്യമായ ധാരണ വേണം. ആഡംബരമായി കാണാതെ, അത്യാവശ്യ ഘട്ടങ്ങളില് മാത്രം ഹോട്ടല് ഭക്ഷണത്തെ ആശ്രയിക്കുന്നതാണ് ബുദ്ധിപരമായ രീതി.